Jackie Collins sterf op 77

Jackie Collins, skrywer van talle topverkopers, is Saterdag in die ouderdom van 77 jaar oorlede.

Sy het borskanker gehad. “Sy het ʼn wonderlike, vol lewe gehad en was geliefd by haar familie, vriende en die miljoene lesers wat sy vir langer as vier dekades vermaak het,” het haar familie in ʼn verklaring gesê. “Sy was ʼn ware inspirasie. Sy sal voortleef deur haar karakters, maar ons mis haar reeds meer as wat woorde kan beskryf.”

Collins is die suster van die bekende aktrise Joan Collins.

Sy is in 1937 in Londen gebore en haar eerste roman, The World Is Full of Married Men, is in 1968 gepubliseer. Dit is gevolg deur boeke soos The World is Full of Divorced Women (1975) en Lovers and Gamblers (1977). Haar roman Hollywood Wives is in 1983 gepubliseer en meer as 15 miljoen eksemplare daarvan is verkoop.

Collins het vroeër vandeesmaand in ʼn onderhoud met People-tydskrif gesê sy is ses jaar gelede met borskanker gediagnoseer. Sy laat drie dogters agter.