Karibadam kan ingee – maar is ou nuus

Karibadam

Karibadam

Ou nuus wat as nuwe nuus afgestof word en gedramatiseer word het daartoe gelei dat ‘n berig oor die Karibadam wat dalk kan ingee, soos ‘n veldbrand deur die mediawêreld versprei het.

Twee jaar gelede het Elton Mangoma, Zimbabwe se minister van energie en kragopwekking in die Zimbabwiese parlement gesê daar is swakhede in die Karibadam se wal aan Zimbabwe se kant, wat daartoe kan lei dat die damwal ingee as daar nie stutwalle gebou word nie.

Hoewel Harare reeds twee jaar gelede oor die minister se opmerking verslag gelewer het, het die nuus nou eers soos ‘n veldbrand versprei toe die Zambiese koerant, die Zambia Daily Mail hieroor verslag gelewer het. Die koerant haal Felix Nkulukusa, voorsitter van die interregeringskomitee, aan wat die dam bestuur. Nkulukusa, wat getaak is daarmee om die nodige fondse te kry om die damwal te stabiliseer, sê die wal kan binne drie jaar breek as daar nie gou werk van gemaak kan word nie.

Indien die damwal breek, sal sowat 3,5 miljoen mense geraak word. Dit sal ook die kragsentrale by die Chohora Bassa-aanleg in Mosambiek oorstroom, en die water sal ook in die Lusaka-vallei opstoot en moontlik Lusaka oorstroom.

Paolo Muxanga, voorsitter van die Hidroelectrica de Cahora Bassa, sê egter hulle is niks laat weet nie. Hy sê hulle weet “al lankal” dat daar probleme by die Karibadam is, maar dat dit so onmiddellik kritiek is, het hulle nie geweet nie.

Bron: The Zimbabwean, Harare 24, Radio Dialogue

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Wêreldnuus

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Jasper ·

Nou gaan Kaptein Caprivi van die 70’s seker die skuld kry.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.