Oudpres. Kenneth Kaunda van Zambië (Foto: STEPHANE DE SAKUTIN / AFP)
Oudpres. Kenneth Kaunda van Zambië is in ʼn hospitaal opgeneem.
Die 97-jarige Kaunda se kantoor het Maandag in ’n verklaring gesê dit gaan nie goed met die oudpresident se gesondheid nie en hy word tans in ʼn militêre hospitaal in die Zambiese hoofstad, Lusaka, behandel.
Geen verdere besonderhede omtrent Kaunda se toestand is bekend gemaak nie hoewel landsburgers sowel as die internasionale gemeenskap gevra is om te bid vir die oudpresident se herstel.
Kaunda het Zambië 27 jaar lank regeer en het die leisels oorgeneem nadat die land in Oktober 1964 onafhanklikheid van Brittanje verkry het.
Kaunda was aanvanklik ’n gewilde leier onder Zambiese burgers hoewel hy later al meer outokraties geword en alle opposisiepartye verbied het.
Hy is uiteindelik tydens die eerste veelpartyverkiesing in 1991 uitgestem en vervang deur Fredrick Chiluba.
Edgar Lungu (64) is tans die president van Zambië.
