Kiesers troef VSA-politiek met Trump-kaart

Donald Trump

Donald Trump is die VSA se nuwe president. Foto: AP Photo/Paul Sancya.

Donald Trump is Amerika se nuwe president.

Trump (70) het sleuteloorwinnings in Florida, Ohio, Iowa en Noord-Carolina behaal om die Demokrate se presidentskandidaat Hillary Clinton te troef. Dit was in die sogenaamde kantelstate (“swing states”) soos Pennsilvanië waar Trump sy finale deurbraak gemaak het. Trump het sy oorwinning verseker deur meer as 270 van die 538 stemme uit die kieskollege op hom te verenig.

Buiten Trump se oorwinning as president sal die Republikeine ook die Senaat en die Huis van Verteenwoordigers beheer. Die inhuldiging van die Amerikaanse president vind elke vier jaar op 20 Januarie plaas.

Donald John Trump is op 14 Junie 1946 in New York gebore. Hy is een van vyf kinders. Trump het in sy jong loopbaan vinnig opgang gemaak as eiendomsmagnaat. Dit was egter sy sosiale lewe en egskeidings wat die nuus gehaal het.

Trump is in 2005 getroud met die model Melania Trump. Hy was twee keer vantevore getroud. Trump het vyf kinders. Drie kinders is uit sy huwelik met Ivana Trump gebore. Hy het ook ʼn dogter saam met die aktrise Marla Maples en ʼn seun saam met Melania.

Sy jare lange betrokkenheid by ʼn realiteitstelevisieprogram oor entrepreneurskap, The Apprentice, waarin hy week na week potensiële werksaansoekers afgedank het met die woorde “you’re fired”, was ’n reusesukses. Hy het in Junie 2015 aangekondig dat hy vir president sal staan.

Ontleding:

Ons het die afgelope paar eeue talle revolusies in Westerse lande gesien. Die meeste daarvan was bloedig. Gister het daar egter ’n revolusie oor Amerika gespoel wat deur gewone kiesers met die mag van die stembrief tydens ’n verkiesing moontlik gemaak is. Met die verkiesing van Trump tot 45ste president van die Verenigde State van Amerika het ’n meerderheid Amerikaanse kiesers besluit om hulle land op ’n totaal nuwe, hoewel onsekere, koers te plaas.

Revolusies ontstaan meestal weens die diepe verbreking van die verhouding tussen regering en volk. Wanneer die gewone mense in opstand kom teen die politieke klas waai die revolusionêre winde en word dié politici wat voorheen byna onaantasbaar was na ander lande verjaag, in die tronk gestop of selfs onthoof. Wat die Amerikaanse kiesers gister gedoen het, is egter minder gewelddadig, maar nie minder belangrik nie. Genoeg kiesers het ’n middelvinger gewys na die politieke regeerderklas in die Republikeinse én Demokratiese Party.

Vir die volgende vier jaar sal Trump president van die magtigste land op aarde wees. Sy mandaat is duidelik. Hy moet die moeras in Washington DC van gevestigde politieke belange gaan dreineer en ’n skoon, eerlike begin aan federale politiek in Amerika maak.

Foto: AP Photo/Paul Sancya

Foto: AP Photo/Paul Sancya

Die mandaat wat Trump van Amerikaanse kiesers gekry het, is duidelik en op die volgende tien punte geskoei:

  1. Geslote grense, minder immigrasie. Trump het ’n duidelike mandaat om grensbeheer op te skerp, ’n beter immigrasiestelsel wat veral meer op geskoolde arbeid fokus daar te stel en om nie vir die miljoene onwettige immigrante wat tans in die VSA woon burgerskap te gee nie.
  2. Beskerming van eie ekonomiese bedrywe. Met oorwinnings in talle state soos Ohio en Indiana in die midweste van die VSA het Trump ’n mandaat van sy getrouste ondersteuningsgroep, wit werkersklaskiesers, gekry om plaaslike vervaardigingsektore teen onbillike handelsooreenkomste en die storting van produkte uit lande soos China en Meksiko te beskerm.
  3. Herroep Obamacare. Trump sal as president dit as een van sy eerste prioriteite stel om pres. Obama se gesondheidsorgwetgewing, Obamacare, te herroep en met ’n meer gedesentraliseerde en vryemarkstelsel te vervang.
  4. Sakevriendelike regulatoriese omgewing. Trump het tydens sy veldtog baie sterk gesteun op sy sake-ervaring. Daar sal van hom verwag word om regulasies te verminder en ’n meer sakevriendelike omgewing, wat ’n eenvoudiger belastingstelsel vir maatskappye insluit, daar te stel.
  5. Uitreik na die swart gemeenskap. Trump het tydens sy veldtog gereeld na swart Amerikaners uitgereik en toon erns daarmee om die situasie in middestede met groot swart bevolkings te verbeter deur beter onderwys, maatskaplike dienste en ekonomiese geleenthede.
  6. Verlaagde betrokkenheid in internasionale konflik. Amerikaners is moeg vir die een oorlog ná die ander. Trump hou die belofte van ’n laer vlak van betrokkenheid in internasionale konflik in. Sy teen-inmengingsretoriek het tot baie Amerikaners gespreek en hy sal gemaklik aan konflik in die Midde-Ooste kan onttrek.
  7. Foto: AP Photo/ Evan Vucci

    Foto: AP Photo/ Evan Vucci

  8. Verbeterde verhouding met Rusland. Die Amerikaners vertrou steeds nie die Russe nie, maar is ook nie lus vir ’n nuwe oorlog met Rusland nie. Trump se belofte van ’n goeie verhouding met Wladimir Poetin kan een van sy eerste suksesse wees.
  9. Hersiening van deelname aan internasionale instellings. Trump se opmerkings oor die Noord-Atlantiese Verdragsorganisasie, die Verenigde Nasies en talle ander internasionele organisasies waarvan die VSA telkemale die grootste finansiële bydraer is, het vir opslae weerskante van die Atlantiese Oseaan gesorg. Die werklikheid is egter: In ’n veranderende en veranderde wêreld moet die rol van die VSA in hierdie organisasies, wat meestal uit die tydperk kort ná die Tweede Wêreldoorlog spruit, herbedink word. Trump sal ’n plig hê om dit te doen.
  10. Ekonomiese groei. Een van Trump se belangrikste punte tydens sy toesprake was talle beloftes oor ekonomiese groei. Hy sal waarskynlik die grootste deel van sy eerste jaar as president hieraan moet afstaan omdat die mense wat vir hom gestem het juis in baie gevalle dié mense is wat tans onder groot ekonomiese druk verkeer.
  11. Terwyl Trump se verkiesing oor die hele wêreld skokgolwe stuur, aandelemarkte val en politieke kommentators die ergste voorspel, het Trump ’n plig om stabiliteit te verseker. Een van die beste maniere waarop hy dit kan doen, is deur die aankondiging van bekwame nominasies vir die meeste kabinetsposte. Presidente doen dit gewoonlik nie so gou ná ’n verkiesing nie, maar in hierdie geval kan dit vir heelwat rustigheid sorg.

Die verkiesing van Trump as volgende Amerikaanse president behoort ’n duidelike boodskap aan politici in ander Westerse lande te stuur dat die woede van gewone kiesers tot die verkiesing van populistiese kandidate aanleiding kan gee. Met verkiesings in Frankryk, Nederland en Duitsland gedurende 2017 behoort die uitslag in die Amerikaanse verkiesing die gevestigde politieke klas tot in hul wortels te skud.

Dat die volgende paar maande ’n onsekere tyd vir Amerika gaan wees, is ’n feit, maar die kiesers het immers vir ’n politieke revolusie gekies.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

81 Kommentare

jongste oudste gewildste
Ou Rubbish

Halleluja en Amen!

Rens Roodt

baie baie bly dat hy gewen het

Riaan

FANTASTIES ! ! ! – Hoop hulle gooi Hillary spoedig in die tronk

charlene

Whoop, Whoop
Go Trump!!!!!!!

stev

MOOI MAN !!!!!!!!!!! :)