Foto: KRIS-TV
ʼn Man van Texas in die VSA is vandeesweek deur die polisie uit die kluis van ʼn kitsbank gered nadat hy homself per ongeluk daarin toegesluit het terwyl hy die slot van die kluis vervang het.
Die man, wat nog nie geïdentifiseer is nie, se enigste uitweg was om handgeskrewe notas deur die gleuf te druk waar die kontant gewoonlik uitkom.
Dié notas het gelees: “Asseblief help. Ek sit vas hierbinne, en ek het nie my selfoon nie. Bel asseblief my baas.”
Volgens die owerhede moes die man talle van dié notas deur die gleufie druk omdat die meeste van die mense wat geld getrek het, gedink het hulle word ʼn poets gebak.
Een man het egter daarin geslaag om die polisie na die toneel te ontbied.
“Toe ons daar aankom, kon ons ʼn stem van binne die masjien hoor,” het Richard Olden, die polisiewoordvoerder, aan CBS gesê. “Ons het gedink dis ʼn grap – dit moes ʼn grap wees.”
Owerhede het uiteindelik daarin geslaag om die man uit die kitsbankkluis te bevry. Hy was ongedeerd.
Ek sou ook gedink het dit is Schuster op sy beste! Bly hy is “bevry” tussen al die note…
lekker giggel ek nou…..
Hehe toe het hy nie eers genoeg geld om kos te kan koop! ;-)
Om hom besig te het hy Noot vir Noot gespeel!
Dit gee nuwe betekenis aan die woord ….kluisenaar