‘n Baie sterk aardbewing van 7,2 op die momentmagnitudeskaal het vakansiegangers in Acapulco op Goeie Vrydagoggend goed laat skrik.
Die aardbewing het net mooi tussen die vakansieplekke Acapulco en Zijuatanejo voorgekom, en is tot in Meksikostad, 265 kilometer daarvandaan gevoel, waar minstens een gebou beskadig is.
In Acapulco het paniekbevange toeriste die strate ingestorm, terwyl winkelvensters gebreek het. Daar was kort na die skudding nog geen berigte oor beserings of ernstige skade nie. Ook in Meksikostad het mense uit veral hoë geboue gevlug, en talle het in hul pajamas op straat beland.
Bronne: CNN, Chron, USGS, Global News