ʼn Minister van Madagaskar en ʼn lid van die land se polisie het 12 uur lank na die strand geswem nadat die helikopter waarin hulle gereis het, in die see neergestort het.
Die helikopter, met vier passasiers, het Maandag langs die kus van Madagaskar neergestort en die minister en ʼn ander insittende kon hulself uit die helikopter werp. Die soektog na die ander twee passasiers duur nog voort.
Serge Gelle, die land se sekretaris-generaal van polisie, en sy medepassasier het die kusdorp Mahambo Dinsdag bereik, het die hoof van die hawebestuur, Jean-Edmond Randriantenaina, aan AFP gesê. Die minister het glo aan een van die helikopter se stoele vasgehou om hom te help om bo die water te bly.
Volgens die polisie is dit nog nie duidelik hoekom die helikopter neergestort het nie.
ʼn Video wat op sosiale media gedeel is, wys die 57-jarige Gelle wat uitgeput op ʼn dekstoel lê, steeds in sy kamoefleer-uniform geklee.
♦️Le GDI Serge GELLE, un des passagers de l'hélicoptère accidenté hier a été retrouvé sain et sauf ce matin du côté de Mahambo.
☑️ Les sapeurs sauveteurs de la #4°UPC ont également retrouvé le carcasse de l'hélicoptère au fond de la mer. pic.twitter.com/sP2abwTMwB— Ministère de la Défense Nationale Madagascar (@MDN_Madagascar) December 21, 2021
“My tyd het nog nie gekom nie,” sê die minister in die video. “Ek is koud, maar het nie seergekry nie.”
Volgens Zafisambatra Ravoavy, polisiehoof van Madagaskar, het die minister nog altyd uitsonderlike stamina getoon. “Hy is ʼn man van staal.”
The Guardian berig die helikopter het die minister en ander insittendes na die toneel van ʼn skeepswrak noordoos van die skip geneem. Maroela Media het vroeër berig minstens 64 mense is in dié ramp dood.