Argieffoto: Phillip Bruwer
ʼn Ma en baba van Frankryk het Dinsdag ʼn noue ontkoming gehad toe ʼn drieverdiepingwoonstelgebou ná ʼn vermoedelike gasontploffing ineengestort het.
Die ma en baba was twee van vyf mense wat in die puin van dié gebou in die Mediterreense kusstad Sanary-sur-Mer in Frankryk vasgekeer was.
Inwoners sê die gasontploffing kon byna agt kilometer ver gehoor word. Twee aangrensende geboue is ook erg in die ontploffing beskadig.
Franse reddingwerkers kon drie van die vyf mense in die woonstelgebou red en is nog op soek na die oorblywende twee.
Volgens die reddingswerkers was die vrou en baba by hul volle bewussyn toe hulle opgespoor is. Die derde persoon wat gevind is, was bewusteloos.
“Dit het meer as twee ure geneem om die baba uit te kry. Hy is deur noodpersoneel op die toneel behandel en dit gaan goed met hom,” het kol. Eric Grohin van die streeksbrandweer gesê.
Volgens die Franse regering het noodspanne op die terrein ʼn sterk gasreuk geruik.
