Die stad Adonara in Oos-Flores is in puin gelê weens kitsvloede en modderstortings. (Foto: Joy Christian / AFP)
Minstens 91 mense is Sondag dood weens kitsvloede en modderstortings in Indonesië en Oos-Timor.
’n Tropiese sikloon genaamd Seroja het Maandag verdere verwoesting tot gevolg gehad namate dit in sterkte toeneem, na die weskus van Australië beweeg en reddingswerkers se pogings belemmer om vasgekeerde oorlewendes te bereik.
Volgens die Indonesiese rampagentskap is minstens 70 mense in dié land dood en nog 70 word vermis nadat modderstortings gister huise meegesleur, bome ontwortel en duisende mense uit hul huise gedwing het.
Minstens 21 mense is dood in Oos-Timor, die oostelike helfte van die eiland Timor wat tussen Indonesië en Australië geleë is. Baie van dié sterftes is in die oorstroomde hoofstad Dili aangemeld.
Oorstromings het verwoesting gesaai op eilande wat strek vanaf die eiland Flores in Indonesië tot Timor-Leste, ’n klein volksgroep oos van die Indonesiese eilandgroep.
Ongeveer 2 500 mense is noodgedwonge in Oos-Timor na veiligheid gebring en nog ’n paar duisend in Indonesië. Sommige het weer toevlug by hul oorspoelde huise gaan soek.
“Die haweloses is versprei. Daar is honderde in elke distrik, maar baie ander bly tog tuis,” het Alfons Hada Bethan, hoof van die rampagentskap in Oos-Flores, gesê.
“Hulle het medisyne, kos en komberse nodig.”
Die Indonesiese president, Joko Widodo, het intussen sy innige meegevoel uitgespreek oor die verwoesting in die suidoostelike eindpunt van die eilandgroep. “Ek verstaan die diepe hartseer wat ons broers en susters weens hierdie ramp ly,” het hy in ’n toespraak gesê.
Dodelike grondverskuiwings en kitsvloede kom gereeld gedurende die reënseisoen in die Indonesiese eilandgroep voor.
Kitsvloede het in Januarie die lewe van 40 mense geëis en verwoesting in die Indonesiese stad Sumedang in Wes-Java tot gevolg gehad.
In September verlede jaar is minstens 11 mense in grondverskuiwings op Borneo dood.
Die plaaslike rampagentskap beraam dat 125 miljoen Indonesiërs – byna die helfte van die land se bevolking – in gebiede woon wat die gevaar van grondverskuiwings loop.
Volgens omgewingsbewustes word die rampe dikwels deur ontbossing veroorsaak.
