Meryl Streep en Don Gummer by die 90ste jaarlikse Oscars-geleentheid in Hollywood, Kalifornië, op 4 Maart 2018. (Foto: Valerie Macon/AFP)
Meryl Streep, die Oscar-bekroonde aktrise, en haar man, die beeldhouer Don Gummer, is al vir ses jaar van bed en tafel geskei.
Streep (74), wat al drie keer ʼn Oscar-beeldjie huis toe geneem het, en Gummer (76) is in 1978 getroud, en vier vanjaar hul 45ste huweliksherdenking.
Die nuus is Saterdag in ʼn verklaring deur ʼn verteenwoordiger van die egpaar aan People bevestig.
Page Six het egter Vrydag eerste oor dié nuus berig.
“Don Gummer en Meryl Streep is al vir meer as ses jaar van bed en tafel geskei, en terwyl hulle altyd vir mekaar sal omgee, het hulle gekies om aparte lewens te lei,” het die verteenwoordiger gesê.
Hulle is die ouers van vier volwasse kinders – ʼn seun, Henry, en drie dogters, Mamie, Grace en Louisa.
Streep en Gummer is nog in Maart 2018 saam by die Oscars afgeneem. Hoewel hulle vroeër gereeld saam vir foto’s poseer het, hou hulle grootliks hul persoonlike lewens uit die media.
Streep is egter nog onlangs met haar trouring aan haar vinger by ʼn toekenningsgeleentheid in Spanje raakgesien.
Gummer kom oorspronklik van Louisville, Kentucky, en het Streep in 1978 deur haar broer ontmoet. Sy het toe net haar kêrel, mede-akteur John Cazale, aan die dood afgestaan weens longkanker.
Bronne: People.com, CNN
Het haar eers gesien in Kramer vs Kramer saam met Dustin Hoffman en verlieg geraak. Lyk nog goet vir 74.
‘n Mens hoef vir seeker nie alles te verstaan nie. Die belangrikste is, dit werk vir hulle en die kinders weet daarvan. Bravo dat hulle die unieke verhouding kan laat werk in die vorem wat julle saam gekies het.
Geliefde aktrise. Pragtig