Minstens sewe mense is dood nadat twee tornado’s Maandagnag die Amerikaanse deelstaat Tennessee getref het. Twee van dié sterftes is in die hoofstad Nashville aangemeld.
Sowat 44 000 mense is Dinsdagoggend sonder elektrisiteit gelaat met talle geboue wat deur die tornado’s beskadig is. Dit sluit die John C Tune-lughawe in Nashville in. Groot skade is veral in die voorstad Mt. Juliet, oos van Nashville, aangerig.
“Ons gemeenskap word erg geraak deur die tornado’s. Verskeie huise is beskadig, mense is beseer en nog mense is vasgekeer. Ons het hulp nodig,” het kapt. Chandler van die plaaslike departement van polisie gesê.
Volgens die brandweerdiens in Nashville is sowat 40 strukture in dié stad beskadig. Sowat 20 mense is ook tans in ’n hospitaal in die stad weens die tornado’s of gepaardgaande storms.
Skole, howe en vervoerstelsels is vandag in Nashville gesluit hoewel stemlokale by skole oop bly vir die publiek. Vier stemlokale is wel na ander plekke geskuif.
Tennessee is een van 14 Amerikaanse deelstate wat in Super Dinsdag stem vir ’n Demokratiese kandidaat vir November se presidentsverkiesing .
Minstens vyf tornado’s is in drie Amerikaanse state aangemeld: Tennessee, Missouri en Kentucky.