ʼn Reuseontploffing by ʼn vulstasie in Sierra Leone se hoofstad, Freetown, het die lewe van minstens 92 mense geëis, het die land se adjunkpresident Saterdag gesê.
Volgens Mohamed Juldeh Jalloh, wat vroeër vandag self die toneel saam met verskeie ander amptenare besoek het, word minstens 88 ander mense vir ernstige brandwonde in hospitale behandel.
ʼn Reddingswerker en ʼn verpleër het vroeër minstens 80 sterftes bevestig, met die verpleër wat sê hy het mans, vroue én kinders met “ernstige beserings” behandel.
Volgens ooggetuies het die ontploffing gebeur toe ʼn voertuig by ʼn vulstasie ná ʼn botsing met ‘n ander vragmotor aan die brand geraak het. Die vlamme het daarna vinnig versprei en mense in voertuie en op paaie in die omgewing gebrand.
Die meeste van die slagoffers is straatsmouse en motorfietsryers. Talle van hulle het in die vlamme beland terwyl hulle brandstof probeer kry het, het Jusu Jacka Yorma, ʼn vrywilliger op die toneel, gesê.
Honderde mense het Saterdag op die toneel saamgedrom op soek na vermiste geliefdes terwyl veiligheidsmagte ʼn wakende oog gehou het. Beeldmateriaal wys ʼn uitgebrande tenkwa en ʼn vragmotor, terwyl die gebied besaai is met uitgebrande wrakke waarvan sommige nog smeul.
Pres. Julius Maada Bio het op Twitter sy diepe medelye met slagoffers betuig en die groot lewensverlies betreur.
“My regering sal alles moontlik doen om die geraakte gesinne te help.”
Die omvang van die skade is nog nie bepaal nie.
#UPDATE At least 80 people have been killed in an explosion at a fuel depot in Sierra Leone's capital #Freetown, a Red Cross rescue worker said Saturday https://t.co/rmY4h7JvQI pic.twitter.com/MwQ0hHbEnW
— AFP News Agency (@AFP) November 6, 2021
Ongelukke met petroltenkwaens het al vantevore in Sierra Leone, een van die armste lande ter wêreld, plaasgevind.
In ander dele van die vasteland het soortgelyke voorvalle ook al verskeie lewens geëis wanneer mense probeer om die lekkende brandstof bymekaar te maak.
In 2009 is meer as 100 mense dood toe ʼn tenkwa noordoos van die Keniaanse hoofstad Nairobi omgeslaan het en ʼn ontploffing diegene verbrand het wat van die brandstof in die hande probeer kry het.
In Tanzanië is minstens 100 mense ook dood toe ʼn tenkwa ontplof het, terwyl meer as 200 mense in 2015 in ʼn soortgelyke voorval in Suid-Soedan dood is.
In een van die jongste voorvalle is 13 mense dood en verskeie ander ernstig beseer toe ʼn vuurbal ʼn skare mense in Kenia oorval het. Die mense was besig om brandstof te tap uit ʼn tenkwa wat kort tevore omgeslaan het.
Darwinian selection !!
Ironies dat die plek se naam Freetown is. Ekskom behoort goed sake te doen daar…