Mogadisjoe-ontploffings: Dodetal styg skerp

Minstens 276 mense is dood en meer as 300 beseer nadat twee motorbomme die naweek in Mogadisjoe, hoofstad van Somalië, ontplof het.

Die eerste van die twee voorvalle het laat Saterdagmiddag in ʼn besige straat voorgekom toe ʼn vragmotorbom voor die Safari Hotel ontplof het. Die ontploffing het talle geboue erg beskadig en brande tot gevolg gehad. ʼn Motorbom het kort daarna in dieselfde omgewing ontplof. Die aanval is een van die dodelikste van sy soort tot dusver in dié land.

Talle van die slagoffers is reeds begrawe aangesien hulle volgens owerhede onherkenbaar verkool is. Honderde inwoners het Sondag in die strate van Mogadisjoe betoog teen die militante Somaliese Islamitiese groep Al-Sjabaab.

Die Verenigde Nasies se veiligheidsraad het die aanval ten sterkste veroordeel. “Terreur in al sy vorme en manifestasies is een van die ernstigste bedreigings vir internasionale vrede en veiligheid,” lui die veiligheidsraad se verklaring. Die raad het gesê alle oortreders, organiseerders en borge van hierdie soort aanvalle moet voor die gereg gedaag word.

Tot dusver het niemand al vir die aanvalle verantwoordelikheid aanvaar nie, hoewel dit vermoed word dat die groep Al-Sjabaab betrokke was.