Foto: Yingluck Shinawatra, AFP
Die grondwetlike hof in Thailand het die omstrede verkiesing van 2 Februarie vanjaar ongrondwetlik verklaar – maar op grond van ‘n baie tegniese punt en nie omdat die vernaamste opposisie dit geboikot het nie.
Sedert November verlede jaar is die land, en veral die hoofstad Bangkok, gereeld deur massabetogings teen die regering van premier Yingluck Shinawatra geruk. Sowat twintig mense is in die onluste dood.
Yingluck word daarvan beskuldig dat sy bloot die marionet is van haar broer, Thaksin Shinawatra, wat in 2006 weens korrupsie deur die leër afgesit is. Thaksin woon sedertdien in die grootste weelde oorsee.
Die Shinawatra’s geniet groot steun in die platteland waar die meeste kiesers woon.
Hoofbron: Trouw
