Boris Johnson sê dit is moontlik dat die inval van Rusland in Oekraïne tot einde 2023 kan voortduur.
“Die hartseer ding is dat dit ʼn realistiese moontlikheid is,” het die Britse premier Vrydag in antwoord op ’n verslaggewer se vraag gesê.
Johnson, wat onlangs verbied is om na Rusland te reis, is tans op ’n besoek van twee dae in Indië.
Johnson het tydens die besoek aan verslaggewers gesê pres. Wladimir Poetin van Rusland het ʼn “katastrofale flater” begaan toe hy beveel het dat Rusland Oekraïne moet binneval.
“Die enigste opsie wat hy nou regtig het, is om voort te gaan om sy afgryslike en neerdrukkende benadering te probeer deurvoer.”
Johnson het gesê ʼn “realistiese” onderhandeling om die konflik te beëindig “lyk nie op die oomblik waarskynlik nie”, maar dat Europa en Oekraïne self uiteindelik toekomstige veiligheidsreëlings sal moet bespreek.
“Wat die Oekraïners wil hê, en ek dink nou gaan kry, is ʼn versameling sekuriteitswaarborge van eendersdenkende lande, sekuriteitsverpligtinge oor wat ons kan doen om hulle te steun.”
Dié sekuriteitswaarborge kan wapens en opleiding insluit om Oekraïne in staat te stel om toekomstige Russiese aanvalle te voorkom.
Frankryk het reeds Vrydag aangedui dat hy swaar artillerie na Oekraïne gaan stuur.
Johnson en ander senior Britse politici word tans verbied om Rusland binne te gaan in reaksie op wat die Russiese regering bestempel as Brittanje se “ongekende vyandige houding” teenoor die oorlog in Oekraïne.