‘n Verlate boot in Mississippi te midde orkaan Nate. Foto: Justin Vicory/The Clarion-Ledger via AP.
Orkaan Nate het Saterdagaand as ʼn kategorie 1-storm naby die mond van die Mississippi-rivier aanland gekom, met winde van sowat 90 myl per uur. Nate is die vierde reusestorm waaronder Amerika gebuk gaan in minder as twee maande, waarvan die vorige drie Harvey, Irma en Maria was.
Sowat 30 mense is al in sentraal-Amerika dood voor Nate die warm waters van die Golf van Mexiko binnegegaan het.
Die Amerikaanse nasionale orkaansentrum (NHC) het intussen hul waarskuwing vir New Orleans na ʼn tropiese storm afgegradeer.
Daar word verwag dat Nate se episentrum van laat Saterdag na Sondagaand oor dele van Mississippi, Alabama en Tennessee sal beweeg en dan sal verswak tot ʼn tropiese depressie.
Noodtoestande is vroeër Saterdag in Louisiana, Mississippi en Alabama verklaar.
Sowat 5 000 mense in Alabama is tans sonder elektrisiteit as gevolg van dié orkaan wat gekenmerk word deur swaar reën en vloede.
Sentraal-Amerika het teen Donderdag baie swaar reën ervaar en 16 mense is in Nicaragua dood, tien in Costa Rica, twee in Honduras en twee in El Salvador.
