Oudpolisieman kan nóg langer vir George Floyd-moord sit

Derek Chauvin tydens die onlangse hofuitspraak. (Foto: Court TV/various sources/AFP)

Verswarende faktore kan ’n verhoogde vonnis vir die voormalige polisiebeampte Derek Chauvin (45), wat verlede maand aan die moord op George Floyd skuldig bevind is, beteken.

Regter Peter Cahill het Woensdag gesê dat Chauvin sy mag misbruik het en met “besondere wreedheid” opgetree het.

“Verswarende faktore soos dié kan moontlik die weg vir ’n langer vonnisoplegging baan.”

Maroela Media het voorheen berig dat Chauvin op die ernstige aanklag, moord in die tweede graad, tot 40 jaar tronkstraf opgelê kan word. Omdat hy ’n eerste oortreder is, is die minimum vonnis 12 en ʼn half jaar.

“Die vertroue wat in die aangeklaagde geplaas was, sluit die vertroue in dat enigeen wat in hegtenis geneem word met respek en redelike geweld hanteer word. Dit sluit in dat mediese behoeftes betyds aandag moet kry,” sê Cahill.

“Dit was besonder wreed om George Floyd stadig dood te maak deur sy vermoë om asem te haal te verhinder. Dít nadat hy duidelik te kenne gegee het dat hy nie asem kry nie.”

Volgens Cahill is nóg ’n verswarende faktor die feit dat kinders op die toneel teenwoordig was en moes toekyk hoe Floyd om sy lewe pleit.

Chauvin sal na verwagting sy lot op 25 Junie vanjaar aanhoor.

Floyd is in Mei in Minneapolis dood nadat Chauvin langer as nege minute met sy knie op ’n geboeide Floyd, wat op die grond gelê het, se nek gedruk het. Beeldmateriaal van die voorval het ’n vlaag Black Lives Matter-veldtogte teen beweerde polisiewreedheid en rassediskriminasie in die VSA tot gevolg gehad.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

17 Kommentare

Genis ·

Ek sal eerder my smoel hou…. netnou net weerspreek ek myself…

Johannes ·

As die man skuldig is, moet hy sy tyd doen. Ek wonder net soms hoe polisiebeamptes dit uithou met die arrogante houdings van die publiek.

Daar is steeds goeie polisiebeamptes daar buite.

koos10 ·

Hy word ‘n voorbeeld van gemaak. 40 jaar tronkstraf vir ‘n misdryf waarvoor 12 – 13 gewoonlik gegee word. Sy skoon rekord tel niks vir hom nie, ook nie die feit dat hy sy werk gedoen het nie.

Dries ·

Daar word gehammer op “i cant breath” Floyd het lank voor n knieg betrokke was al gekla “i cant breath” Toe hy nog in die kar was. Toe Chauven se knieg op sy nek was het hy net aangegaan. Chauven het hom net nie meer geglo nie. Ek sou dalk ook nie. Chauven is n ongelukkige slagoffer van omstandighede

Filistyn ·

Wit op Swart = rassisme . Swart op wit = voorheen benadeeldes.

Sarel ·

Dit is maar aan die orde van die dag simpatie vir die misdadiger teenoor die mense wat rlke dag die ondankbare taak het om ‘n gemeenskap te beskerm wat dit nie waardeer nie.

Thom ·

Ek is jammer vir Chauvin ___ ek duld nie eers brutaliteit teenoor ‘n dier nie __ om ‘n geboeide man te bly karnuffel klink baie erg en onverskoonbaar .

Blikkies ·

Hierdie was n klug van ‘n verhoor en ‘n politieke uitslag. Daar moes van hom n voorbeeld gemaak word om die BLM stil te maak. Almal in hiedie saak van die ondersoekbeampte, getuienis, aanklaer, regter tot by die jurie was eensydig van die eerste dag af. Nie een van die bewystukke of selfs die onafhanklike patologiese verslag was eers na gekyk nie. Weet nie of hy mag nie, maar vir Reg en Geregtigheid moet hy appeleer vir ‘n her-verhoor, maar in n onpartydige staat of land, met onpartydige aanklaers, regter en jurie lede. Met al die bewyse, teen en vir. Hierdie ou het van die begin af nie ‘n kat se kans gehad nie.

Stefaan ·

Blikkies ek nie nie meer saam stem nie . Hy is voor sy verhoor al deur die media skuldig bevind. Dit alles net om sekere ongewenste groepe te paai. Dit gaan so ook hier by ons. Dit gaan nie meer oor reg of verkeerd nie. Dit gaan oor wit en swart . Kom ons bid dat geregtigheid binnekort sal seëvier.

Pieter ·

Ek verstaan steeds nie die moordklag nie. Floyd het reeds voor hy arresteer is ‘n “lethal dose” van twee verskillende drugs ingeneem. Dit is waaraan hy dood is, en die “feit” dat hy nie kon asemhaal nie heel moontlik daaraan te wyte, soos bewys dat hy reeds nie kon asem kry nie selfs toe hy nog in die kar was.
Die tegniek om hom in bedwang te hou met ‘n knieg op die nek is in my opinie ‘n geldige manier om iemand wat groter en sterker as jy is te beheer. Dit is in elk geval nie moontlik om iemand te wurg deur net druk op een kant van die nek toe te pas nie.
Chauvin se skuldigbevinding is ‘n ernstige klag teen die Amerikaanse regstelsel en hul rasbeheptheid. Dis nie die eerste keer nie. Eks polisiemanne sit vir jare oor vals aanklagte. Google Daniel Holzclaw.

Dries ·

Wat het geword van die jurie lid wat afgeneem is met sy BLM T-shirt

Thom ·

Wat het geword van al die ander jurie-lede ? Waarom bevraagteken julle almal behalwe die persoon wat ‘n geboeide man met sy knie teen die grond vasgepen het ? Vergeet die oorledene se kleur ___ kom oor julle middeleeuse vooroordeel ! Moord bly moord __ swart op wit en presies netso wit op swart . Ek skaam my vir julle .

Blikkies ·

Thom, jy weet nie waarvan jy praat nie,. ……sou jy daardie man skuldig kon bewys aan moord bo alle redelike twyfel, en hom skuldig kry aan al die vereistes wat so ‘n misdaad aan moet voldoen, en met al die bewyse voor jou? as jy eerlik met jouself is, Nee, ek dink nie so nie.

Thom ·

Nadat ek alle inligting verwerk het en nie net brokkies verdraaide verdediging nie , is Chauvin so skuldig as kan kom . Kyk na die video’s , die tyd wat die knie op die nek was en omstanders se pleidooie dat die man nie weerstand gebied het nie ___ uiters brutaal en roekeloos .

Jack ·

Skuldig is skuldig maar hier word n politieke voorbeeld van die polisieman gemaak. Ek glo ook dat ons moet onthou dat elkeen nog steeds n persoon van sy eie is en dat hy nie nou as “ die polisie wat so optree” gesien moet word nie. Ons het dieselfde probleem in ons land maar baie daarvan verdwyn onder die persiese mat in die hoof se kantoor.

Niklaas ·

Die boodskap is duidelik vir die buite wereld . Arme Chauvin , wat net sy werk gedoen het , is nie in die beskuldigde bank nie , nee …Die Vereenigde State van Amerika is. Daar was ook geen ander uitspraak te wagte nie. Selfs ou Biden sou protesteer as die uitspraak enigiets ander sou wees as Skuldig. Nou moet die hof net nie waag om enigiets minder as 15 jaar op te lê nie !

Yolandie ·

Dink die regter wat die misdaad as besonder wreed beskryf moet bietjie na plaasmoorde in SA kom kyk. Belaglik en oordrewe wanneer politieke agendas gedryf word neh. Dan gooi mens reg en geregtigheid by die venster uit en goeie oordeel daarby. Krimineel word ‘n held……how times have changed.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.