Oudpolisieman skuldig bevind aan moord op George Floyd

Derek Chauvin luister na die uitspraak. (Foto: Court TV/various sources/AFP)

Derek Chauvin, ʼn voormalige polisiebeampte van Minneapolis, is Dinsdag skuldig bevind aan die moord op George Floyd.

Die jurie het ná sowat 11 uur lange beraadslaging die 45-jarige Chauvin skuldig bevind aan al drie aanklagte teen hom: moord in die tweede en derde graad én manslag.

ʼn Skare wat te midde van ʼn swaar polisieteenwoordigheid buite die hof in Minneapolis byeengekom het, het gejuig en ander het in trane uitgebars nadat die uitspraak gelewer is ná ʼn verhoor van drie weke.

Chauvin, wat op borgtog was, se hande is geboei nadat regter Peter Cahill die eenparige uitsprake voorgelees het. Chauvin is hierna deur polisiebeamptes uit die hofsaal begelei, terwyl een van Floyd se broers, Philonise Floyd, die aanklaers omhels het.

Chauvin kan op die ernstige aanklag, moord in die tweede graad, tot 40 jaar tronkstraf gevonnis word. Vonnisoplegging sal eers later plaasvind.

Floyd is in Mei in Minneapolis dood nadat Chauvin langer as nege minute met sy knie op ʼn geboeide Floyd, wat op die grond gelê het, se nek gedruk het. Beeldmateriaal van die voorval het ʼn vlaag Black Lives Matter-veldtogte teen beweerde polisiewreedheid en rassediskriminasie in die VSA tot gevolg gehad.

Floyd se broer, Rodney, het aan AFP gesê dat swart mense in Amerika al honderde jare lank die slagoffers van dodelike onreg deur die owerheid is. “In hierdie geval het ons ʼn oorwinning nodig gehad, dit was baie belangrik, en ons het dit reggekry.”

Pres. Joe Biden en adj.pres. Kamala Harris het die land toegespreek na die uitspraak gelewer is. (Foto: Brendan SMIALOWSKI/AFP)

Pres. Joe Biden het lede van die Floyd-familie gebel om te sê hy is “verlig” oor die uitspraak. Hy en adj.pres. Kamala Harris het die land ook later in ʼn regstreekse TV-uitsending toegespreek.

“Dit kan ʼn reusestap vorentoe wees in die opmars na geregtigheid in Amerika,” het Biden gesê terwyl hy ʼn beroep op burgers gedoen het om teen rassisme en geweld te verenig.

Harris het vir die Floyd-familie gesê dat dit “ʼn dag van geregtigheid in Amerika was” en dat “die geskiedenis op hierdie oomblik sal terugkyk”.

Drie ander polisiebeamptes wat by Floyd se inhegtenisneming betrokke was, sal later vanjaar verhoor word.

 

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

53 Kommentare

jongste oudste gewildste
Hennie

Hoekom? Omdat hy ‘n WIT POLISIE MAN is. Moord is iets wat vooraf beplan moet word met ‘n vasgestelde motief, maar nee, as jy wit is, dan is jy skuldig! Belaglik! Wat was sy motief vir moord a hy die Floyd krimineel nie eers geken het nie?

Tiptol

Politiese uitspraak.

Jack

Ek stem.Alles net om die liberale en demokrate gelukkig te hou.

A

As dit nie was vir die selfoon video nie, sou hy vrygeloop het.

Ons almal loop rond met videokameras in ons sakke deesdae. Dit is ons burgerlike plig om die polisie af te neem, om hulle in toom te hou.

Frederick Johannes

BLM en hulle liberalistiese wittes is besig om wèreldwyd reg en geregtigheid te ondermyn met hulle sogenaamde voorheen benadeelde beleid. Kyk maar in suid afrika watter onkostes die voorheen benadeeldes veroorsaak en dit gaan net aan en aan. Ons eie regstelsel se wiele het ook afgeval as jy kyk na diskriminasie teen velkleur in ons howe. Diskriminasie en onregverdigheid word nie eers meer verdoesel nie, dit vind openlik plaas en word onderskryf deur ons sogenaamde regstelsel!