Prins Philip se motor nou museumstuk

Galle Face Hotel se voorsitter Sanjeev Gardiner by die Standard Nine-kar wat oorspronklik deur prins Philip besit is. (Foto: Ishara S. KODIKARA / AFP)

ʼn 90 jaar oue motor wat voorheen aan oorlede prins Philip behoort het, gaan nou die fokuspunt van ʼn museum in Sri Lanka wees.

Prins Philip, ʼn groot motorliefhebber, het die Standard Nine 1935 in 1940 gekoop, toe hy saam met die Britse vloot in Colombo, Sri Lanka se hoofstad, geplaas is.

Hy het die motor destyds tweedehands vir 12 pond (R235 in vandag se geldwaarde) gekoop. Volgens Sanjeev Gardiner, wat die voertuig vir die prins gehou het nadat hy uit Sri Lanka weg is, was dit die eerste motor wat die hertog van Edinburgh gekoop het.

Galle Face Hotel se voorsitter Sanjeev Gardiner en sy seun Seshaan by die Standard Nine-motor wat oorspronklik deur prins Philip besit is. (Foto: Ishara S. KODIKARA / AFP)

Toe die hertog in 1950 na die stad terugkeer, het hy die motor weer by die Galle Face Hotel raakgesien, waar Gardiner dit gehou het. “Ek hoop die kar se brieke werk, want dit het nie destyds gewerk nie,” het prins Philip toe opgemerk. Die motor het tans net meer as 93 000 km op, is reeds verskeie kere herstel en kan steeds mee gery word.

Prins Philip is die afgelope week in die ouderdom van 99 jaar oorlede en word Saterdagmiddag ter ruste gelê. Sy begrafnis kan hier gekyk word.

Hy het graag self motor bestuur en het eers as 97-jarige sy bestuurslisensie opgegee, nadat hy in ʼn ongeluk met sy Land Rover Defender betrokke was. ʼn Land Rover Defender, wat spesifiek vir dié doel ontwerp is, sal ook Saterdag die hertog se kis tydens die begrafnis vervoer.