Dit word gevrees dat agt mense moontlik omgekom het toe ’n helikopter toeriste op ’n besigtiging van ’n vulkaan in Rusland geneem en in ’n nabygeleë meer neergestort het.
Die Russiese regering het Donderdag bekend gemaak dat ’n Mi-8-helikopter met 16 mense – 13 toeriste en drie bemanningslede – in ’n natuurreservaat by die bergagtige Kamchatka-skiereiland neergestort het.
“Agt mense is gered; twee van hulle is in ’n ernstige toestand,” lui ’n verklaring deur Alexander Zabolichenko, ʼn senior amptenaar in die betrokke streek.
Luidens mediese bronne kon die lot van agt van die passasiers egter nog nie bepaal word nie. Die ergste word nou gevrees.
Die helikopter het die groep toeriste ten tyde van die voorval na Khodutka, ’n vulkaan naby die stad Petropavlovsk-Kamchatsky, geneem. Die helikopter het egter in die Kuril-meer neergestort.
Sowat 40 reddingswerkers en duikers is na die toneel ontplooi om bystand te verleen.
Die Russiese ondersoekkomitee, wat vliegongelukke in Rusland ondersoek, ondersoek intussen die moontlikheid dat lugreëls oortree is.
Rusland het in die verlede ’n swak reputasie gehad wat lugveiligheid betref, hoewel dit sedert die 2000’s aansienlik verbeter het. Dít nadat die land se grootste lugrederye die skuif van verouderde Sowjetvliegtuie na meer moderne vliegtuie gemaak het.
Swak onderhoud en swak nakoming van veiligheidsreëls kwel egter steeds.
’n Vliegtuig van ’n klein plaaslike maatskappy het net verlede maand ook op die skiereiland neergestort. Dié vliegongeluk het die lewe van 19 mense geëis.
’n Russiese vliegtuig het in Mei 2019 aan die brand geslaan tydens ’n noodlanding op die Sheremetyevo-lughawe in Moskou. Altesame 41 mense het toe sterf.
VIDEO: Rescuers arrive at helicopter crash site in Russian far east.
The helicopter carrying 16 tourists and crew on a volcano sightseeing trip in the mountainous Kamchatka peninsula crashed into a lake leaving eight people feared dead https://t.co/3FAgXkaAhs pic.twitter.com/HPT175Inyq
— AFP News Agency (@AFP) August 12, 2021
Sal liewers verkies om nie op ‘n Russisie vliegtuig of helikopter te klim nie dankie!