Samsung-wasmasjiene nou ook herroep

Nagenoeg drie miljoen Samsung-wasmasjiene word herroep na talle berigte oor mense wat beserings opgedoen het.

Amerikaanse owerhede het besluit om die wasmasjiene te herroep, weens “oormatige vibrasie”. Talle beserings is aangemeld, waaronder ʼn gebreekte kakebeen.

Die besluit om die wasmasjiene te herroep, kom minder as ʼn maand nadat Samsung aangekondig het dat van sy wasmasjiene, wat in Kanada verkoop is, ook herroep sal word.

Dit is nie die eerste keer dat Samsung wasmasjiene herroep nie. Dit het ook in 2013 in Australië gebeur, nadat ʼn elektriese fout in seker modelle veroorsaak het dat die masjiene aan die brand slaan.

Die nuutste probleem kom in bolaaiers voor en veroorsaak dat die drom ongebalanseerd raak, wat oormatige vibrasie veroorsaak en in sommige gevalle tot gevolg het dat die boonste gedeelte van die masjiene loskom van die onderstel.

Regsverteenwoordigers van gebruikers in Texas, Indiana en Georgia, het met regstappe teen Samsung begin, nadat wasmasjiene glo “ontplof” het terwyl dit gebruik word.

Volgens Samsung kom die probleem voor wanneer ʼn hoëspoed-spinsiklus gebruik word om beddegoed of ander groot items te was.

Samsung se herroeping kom kort nadat die Suid-Koreaanse maatskappy bykans ’n miljoen Galaxy Note 7-slimfone herroep het omdat hulle moontlik kan ontplof terwyl die slimfoon herlaai.

Lees ook:
Onttrekking van gevaarlike produkte in SA