Minstens sewe Covid-19-pasiënte is Saterdag dood toe ʼn brand by ʼn hospitaal in Kaïro, Egipte, uitgebreek het.
Sekuriteit- en regsbeamptes het gesê die brand het in die hoësorgeenheid van die hospitaal in Obour uitgebreek. Nog vyf persone het beserings opgedoen.
Die oorsaak van die brand is nog nie bekend nie. ʼn Ondersoek is van stapel gestuur.
Plaaslike media het berig brandbestryders is ontbied en kon verhoed dat die brand na die res van die hospitaal versprei.
Egipte het tot dusver 130 126 Covid-19-gevalle, insluitend 7 309 sterftes, aangemeld. Gesondheidsfasiliteite in die land is onder druk weens die toename in getalle.