Sewe sterf in helikopterongeluk

Die helikopterwrak wat in die gletser vasgeval het Foto: Nieu-Seeland-polisie

Die helikopterwrak wat in die gletser vasgeval het Foto: Nieu-Seeland-polisie

Sewe mense is Saterdag dood toe ʼn helikopter op ʼn gletser in Nieu-Seeland neergestort het.

Volgens plaaslike media het die polisie gesê ʼn reddingspan is uit die lug na die ongelukstoneel afgesak en gevind dat niemand die ongeluk oorleef het nie.

Die New Zealand Herald berig die ses passasiers was buitelandse toeriste, maar geen verdere inligting is beskikbaar nie.

ʼn Foto deur die polisie se soekspan wys die wrak het in ʼn skeur op die Fox-gletser vasgeval.

Volgens beamptes kan gure weer en swak vliegtoestande die reddingspoging om die oorskot uit te haal, bemoeilik.

Die Fox-gletser aan die weskus van die suidelike eiland is ʼn gewilde toeristebestemming, veral in die somer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae