Skeepswrak onder Wêreldhandelsentrum se herkoms bepaal

Die skeepswrak wat opgespoor is Foto: Lower Manhattan Development Corporation, via Columbia University (discovery.com)

Die skeepswrak wat opgespoor is Foto: Lower Manhattan Development Corporation, via Columbia University (discovery.com)

Vier jaar gelede, terwyl konstruksiewerkers op die terrein gegraaf het waar die Wêreldhandelsentrum eens gestaan het, het hulle stom verbaas 6,7 meter onder die grondvlak op ‘n skeepswrak afgekom.

Hoewel die skip waarvan die deel wat herwin is tien meter lank is, nie presies geïdentifiseer kon word nie, is wel bepaal waar en wanneer dit gebou moes wees. Deur onder meer die ringe van die hout te ontleed, kon bepaal word waar die bome gegroei het waarvan dit gebou is, en hoe lank gelede die skip gebou is.

Dit blyk dat die romp van wit eik uit die omgewing van Philadelphia aan die VSA se ooskus kom, en so ook die kiel wat van ‘n skaarser houtsoort gemaak was. Die skip moes in ongeveer 1773 gebou gewees het. Die ringe verklap die klimaat oor ‘n lang tydperk, en so kan bome wat in dieselfde omgewing gegroei het, met mekaar in verband gebring word.

Tonnels wat deur wurms in die hout geboor is, het verklap dat die skip minstens een keer in sy dienstydperk besoek aan die Karibiese See moes gebring het.

Die ondersoek het ook aan die lig gebring dat die hout uit dieselfde omgewing is, en uit dieselfde tyd dateer as die hout wat gebruik is om ‘n deel van die historiese Independence Hall te bou. Die Amerikaanse onafhanklikheidsverklaring en die grondwet is in hierdie gebou geteken.

Dit is steeds nie duidelik hoe die skip op die bepaalde plek te lande gekom het nie. Die plek waar dit gevind is, is destyds opgevul, en dit is onseker of die skip as deel van die opvulmateriaal gebruik is, en of dit vroeër op die plek gesink het en toegegooi is.

Klik hier om die volledige artikel in Discovery.com te lees.

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Wêreldnuus

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Starr ·

Di’s nou interessante nuus. Ek hou van interessante nuus. :-)

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.