‘n Man wat ‘n uiltjie geknip het tussen kartonbokse in een van San Francisco se herwinningsbakke, het ‘n noue ontkoming gehad.
Onbewus van die slapende se teenwoordigheid, het die drywer van die vragmotor wat die vragte laai, die bak met ‘n hidroliese toestel in die vragmotor se ruim omgekeer, waarna die kompaktering van die vrag begin het. Die slapende het wakker geword toe hy die “knyp” begin voel, en hard uitgeroep.
Gelukkig het die drywer hom gehoor, die hidroliese kompakteerder afgeskakel, en reguit met hom na die naaste brandweerstasie gery.
Die man is bevry, en is weens ‘n erg beseerde skouer per ambulans hospitaal toe geneem. Hy sal na verwagting volkome herstel.
Indien die man sy “bestemming” lewend bereik het, sou hy waarskynlik nie die storting onder meters gekompakteerde papier oorleef het nie.
Bron: ABC San Francisco
Jitte, dit noem ek nou ‘n noue ontkoming.