Susan Boyle aangeval, beledig

Susan Boyle (Foto: Facebook)

Die Skotse sangeres Susan Boyle word glo al ʼn geruime tyd geteister deur ʼn groep van sowat 15 jong seuns in haar tuisdorp, West Lothian in Skotland. Na bewering word sy getart, beledig en aangeval.

ʼn Familielid van Boyle het vandeesweek gesê die getart en dreigemente aan haar word só erg dat sy en haar bestuurspan oorweeg om die polisie by die saak te betrek.

Volgens die The Mirror kan dié groep seuns, almal tussen die ouderdomme van 16 en 18, ook verbind word met talle ander klein misdade in die omgewing.

Die groep seuns het die sangeres glo beledig, ʼn bus waarin sy gery het met klippe bestook en in ʼn ander geval ʼn papier aan die brand gesteek en dit in haar gesig gegooi. Volgens The Mirror het die seuns haar ook al met los items gegooi.

Die familielid het gesê Boyle is nie daartoe in staat om sulke gedrag bloot af te skud nie, grootliks as gevolg van Asperger se sindroom waaraan sy ly en wat veroorsaak dat sy dit nie noodwendig kan verwerk nie.

Boyle se bure het glo ook al oor die seuns gekla. Volgens een van haar bure het die groep seuns al rassistiese aanmerkings oor haar gemaak en haar met ʼn glasbottel gegooi.

Die sangeres wat tweede plek verower het in die Britain’s Got Talent-werklikheidsreeks van 2009, bly steeds in die raadsbehuising waarin sy grootgeword het. Sy het dié huis gekoop kort ná haar deelname aan die reeks. Hoewel sy ook ʼn ander huis in dieselfde dorp gekoop het, kon sy glo nie “aan die plek gewoond raak nie”, en het daarom die huis vir ʼn familielid gegee.

Boyle is bekend daarvoor dat sy nie spandabelrig of in weelde leef nie. The Mirror het vroeër berig dat die duurste items in haar huis ʼn pelsjas en ʼn bottel Chanel No. 5-parfuum is.

Dít alles ten spyte van die feit dat sy na raming sowat R360 miljoen sterk is.

Boyle se bestuurspan het egter gesê indien die polisie nie vir die gemeenskap in die bres tree nie, sal haar toekoms in West Lothian heroorweeg moet word.

Bron: Daily Mail, The Mirror

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Sw

Swak opgevoede kinders.

Cherokee

Het Susan Boyle opgehou sing of waarom hoor mens nie meer van haar nie? Dit is een van die lekker videos om te kyk waar sy die beoordelaars verras, verstom en kritici uitkikker tydens haar eerste vertoning.

gatiep

Ek sou nooit so iets verwag het van die skotte nie altyd gedog hulle is mense met goeie opvoeding.

C

Gatiep, ek stem saam. Ek het self so gedink, maar dit blyk die hele wereld is in rep en roer. Daar is nerens meer n plek van vrede nie……oral gaan dit agteruit en nerens is daar meer respek nie.

G

Asperger se sindroom waarin sy ly? Moet dit nie wees ‘waaraan sy ly’ nie? En ja, ek weet ek is nou soos ‘n ou tannie met ‘n nat broek…