Talle dood, 1 000 beseer tydens aardbewing in Turkye

Reddingswerkers werk aan ʼn gebou wat ineengestort het tydens die aardbewing in Turkye (25 Januarie 2020) (Foto: IHA via AP)

Minstens 22 persone is dood en meer as 1 000 persone beseer tydens ʼn aardbewing in Turkye.

Suleyman Soylu, minister van binnelandse sake, het tydens ʼn perskonferensie gesê 39 persone is reeds uit die puin gered nadat geboue ineengestort het, insluitend ʼn vrou wat 14 uur ná die oorspronklike aardbewing gered is.

Die aardbewing het Vrydagaand om 20:55 (plaaslike tyd) plaasgevind op ʼn diepte van 6,7 km naby Sivrice, het die ramp- en nooddiensbestuurpresidensie (AFAD) gesê. Verskeie moniteringsentra het gesê die aardbewing was tussen 6,5 en 6,8. Afad het gesê dit is gevolg deur 228 naskokke, waarvan die sterkste tussen 5,1 en 5,4 was.

Reddingswerkers is steeds op soek na persone wat onder die puin vasgekeer is, het Fahrettin Koca, minister van gesondheid, bygevoeg.

Nooddienswerkers en veiligheidsmagte het tente, beddens en komberse versprei terwyl die temperatuur oornag tot laer as vriespunt gedaal het. Moskees, skole, sportsale en koshuise het hul deure oopgemaak vir honderde persone wat dakloos gelaat is.

“Die aardbewing was baie erg. Ons het desperaat uit ons huis gehardloop,” het Emre Gocer aan die staatsbeheerde Anadolu-nuusagentskap gesê. Hy skuil tans saam met sy gesin by ʼn sportsaal in Sivrice. “Ons het nie tans ʼn veilige plek waar ons kan bly nie.”

Reddingswerkers werk aan ʼn gebou wat ineengestort het tydens die aardbewing in Turkye (25 Januarie 2020) (Foto: IHA via AP)

Minstens vyf geboue in Sivrice en 25 in Malatya is verwoes, het Murat Kurum, minister van omgewingsake, gesê. Honderde ander strukture is beskadig en onveilig verklaar.

Soylu het gesê 18 persone is dood in Elazig en vier in Malatya. Ongeveer 1 030 persone is beseer. Koca het tydens die perskonferensie gesê 34 persone is in die hoësorgeenheid in die hospitaal.

ʼn Tronk in Adiyaman, 110 km suidwes van die episentrum, is ontruim nadat dit tydens die aardbewing beskadig is. Altesaam 814 gevangenes is na tronke in omliggende stede gestuur.

“Ons grootste hoop is dat die dodetal nie sal styg nie,” het Mustafa Sentop, speaker van die parlement, gesê.

Kommunikasiemaatskappye het gratis telefoon- en internetdienste vir inwoners in die streek aangekondig. Turkish Airlines het ekstra vlugte aangekondig.

Soylu het gesê nooddienswerk duur voort onder die risiko van naskokke.

Elazig is ongeveer 565 km oos van die hoofstad Ankara.

Ongeveer 18 000 persone is in 1999 in Turkye dood toe twee sterk aardbewings die land getref het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

3 Kommentare

Gerhard ·

Mensekind maak oop jul oë die koms van die Here is naby Hy waarsku ons in sy woord aardbewings oorloë en gerugte van oorloë.

Michelle ·

Gerhard dis SÓ waar wat jy sê… Wens net meer mense wil besef die wederkoms is voor die deur! Die wêreld sien uit na die koms van Jesus!

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.