Talle dood na nog ’n massaskietery in VSA

(Foto: Chet Strange/Getty Images via AFP)

Minstens 10 mense is dood, onder wie ’n polisiebeampte, na ’n skietvoorval by ’n kruidenierswinkel in die Amerikaanse deelstaat Colorado.

Die vermeende moordenaar is gewond en is in aanhouding, het Michael Dougherty, distriksadvokaat van Boulder County, 50 km noordwes van Denver, gesê.

Eric Talley (51), ’n polisiebeampte, is in die skietery dood. Hy was een van die eerste beamptes op die toneel by die King Soopers-kruidenierswinkel.

Polisiebeamptes het omstreeks 14:30 Maandag (plaaslike tyd) gereageer op telefoonoproepe oor skote wat in die gebied afgevuur word. Volgens ooggetuies was daar verskeie geweerskote en het talle inkopiegangers by ’n agterdeur uit die gebou gevlug.

Tientalle gepantserde voertuie, ambulanse en gewapende beamptes, onder wie FBI-agente en SWAT-spanne, is na die toneel ontplooi.

“My hart breek terwyl hierdie onbeskryflike gebeurtenis in ons Boulder-gemeenskap afspeel,” het Jared Polis, goewerneur van Colorado, gesê en die voorval as ’n “sinnelose tragedie” bestempel.

“Woorde kan geen reg laat geskied aan die tragedie wat vanmiddag hier afgespeel het nie,” het Sam Weaver, burgemeester van Boulder, op Twitter gesê.

Twee van die berugste massaskietvoorvalle in Amerika se geskiedenis het in Colorado plaasgevind.

In 1999 het twee tienerseuns 12 van hul klasmaats en ’n onderwyser aan die Columbine High School doodgeskiet voordat hulle hulself om die lewe gebring het.

In 2012 het ’n swaar gewapende man by ’n rolprentteater in Aurora ingestorm en 12 mense doodgeskiet. Die man dien nou lewenslange tronkstraf uit sonder die moontlikheid van parool.

Agt mense, ses van hulle Asiese vroue, is verlede week dood in skietvoorvalle by drie verskillende spa’s in die Amerikaanse deelstaat Georgia.