Talle dood ná ontploffing waar Ethiopiese minister praat

Abiy Ahmed waai vir die skare (AP/Mulugeta Ayene)

ʼn Bomontploffing by ʼn byeenkoms in Addis Ababa wat bedoel was om steun aan die land se nuutaangestelde eerste minister te toon het dié naweek talle lewens geëis.

Abiy Ahmed, wat in April vanjaar as eerste minister aangestel is, het dié nuus bevestig.

Die dagblad Khaleej Times berig die ontploffing het glo plaasgevind kort nadat Ahmed sy toespraak by Meskel Square in die land se hoofstad gelewer het.

“ʼn Paar Ethiopiërs is beseer,” het hy in ʼn regstreekse televisieuitsending gesê. “Daar is ook talle wat hulle lewe verloor het.”

Ahmed het die voorval bestempel as ʼn “onsuksesvolle poging deur magte wat nie Ethiopië verenig wil sien nie”.

Seyoum Teshome, ʼn lid van die komitee wat die byeenkoms gereël het, het aan dié dagblad gesê die verdagte het ʼn handgranaat gebruik en dit “na die verhoog probeer slinger waar Ahmed gepraat het”.

Ahmed het ʼn reeks radikale hervormings uiteengesit sedert sy amp in April. Hy het vroeër vanjaar gesê hy is bereid om ʼn ooreenkoms te onderteken wat ʼn twee jaar lange oorlog tussen Ethiopië en Eritrea tot ʼn einde sal bring.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Hendrik van George ·

Ek is redelik seker die oorlog tussen Etiopië en Eritrea duur al langer as 2 jaar…

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.