Trump ontken gebruik van kragwoord

donald trump

Pres. Donald Trump. Foto: AP Photo/Alex Brandon

Pres. Donald Trump het Vrydag erken dat hy “sterk” woorde gebruik het tydens ʼn vergadering oor ʼn tweeparty-immigrasieooreenkoms, maar ontken dat hy ʼn kragwoord gebruik het.

Maroela Media het vroeër berig Trump het na bewering verwys dat immigrante van “sh*thole” lande nie in die VSA toegelaat moet word nie.

“Die taal wat ek by die vergadering gebruik het, was sterk bewoord, maar dit is nie die taal wat ek gebruik het nie. Wat regtig taai was, was die belaglike voorstel wat gemaak is – ʼn groot terugslag vir DACA!” het hy op Twitter geskryf.

DACA is die “Deferred Action for Childhood Arrivals”, ʼn Amerikaanse immigrasiebeleid wat vergunning gebied het aan persone wat Amerika as minderjariges onwettig betree of in die land aangebly het, en ʼn hernubare twee jaar uitstelperiode gekry het voor hulle gedeporteer sou word of aansoek kon doen vir ʼn werkspermit. Ongeveer 800 000 individue – na wie verwys word as Dreamers aldus die DREAM-wet – is vanaf 2017 by die program ingeskryf. Die beleid is in Junie 2012 deur die Obama-administrasie ingestel en die Trump-administrasie het dit in September 2017 herroep.

Woordvoerders vir die Withuis het Vrydag nie dadelik reageer op ʼn versoek vir klaarheid nie. Die Withuis het Donderdag nie ontken dat Trump die kragwoord gebruik het nie, soos aanvanklik berig deur The Washington Post en daarna bevestig deur verskeie ander nuusbronne.

Volgens verskeie bronne was die Amerikaanse president Donderdag warm onder die kraag vir wetgewers toe hulle bespreek het hoe immigrante van Haiti, El Salvador en Afrikalande beskerm kon word as deel van die tweeparty-immigrasieooreenkoms. “Hoekom laat ons al hierdie mense van ‘sh*thole’ lande hierheen kom?” het Trump gesê. Hy het toe voorgestel dat die VSA meer mense toelaat van lande soos Noorweë. Hy het Woensdag met die eerste minister van dié land vergader.

ʼn Beampte van die Withuis het gesê Trump het ook voorgestel dat hy eerder genoeë sal skep in immigrante van Asiatiese lande, omdat hulle waarskynlik die VSA ekonomies sou kon bystaan.

Die president het ook spesifiek na Haiti verwys en glo aan die wetgewers gesê immigrante van dié land moet uit enige ooreenkoms gelaat word. “Hoekom het ons nog Haitiane nodig? Haal hulle uit.” Die Trump-administrasie het in November ʼn deportasiebeskerming vir nagenoeg 60 000 Haitiane teruggetrek wat uitgereik is ná die 2010-aardbewing. Hy het gesê hulle moet voor Julie 2019 na hul land terugkeer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
jaco

As Trump se republikeinse party dan die Withuis, die huis van verteenwoordigers en die senaat beheer, kon hulle mos al lankal al hierdie vrygewige immigrasiewette geskrap het.

Zachrys

Wat het kragwoorde met die prinsiep van die saak te doen?
Hy IS heeltemal reg… In twee opsigte: om kwaad te word én met sy redenasie.

Fran

Hy is mos maar altyd kwaad en dan moet almal bang word of wees. Wie steur hulle nog aan sy uitlatings? En om te dink hy sink homself :)

Hanna

Dis hierdie einste sh*thole lande wat die Weste met so n passie haat… Maar Amerika en Europa se geld is altyd welkom! En waar vlug hulle heen? Juis die Westerse lande! Stuur hulle terug na hul eie mislukte lande toe.

Daan

As Presedent Trump so gesê het stem ek met hom saam want dit is die waarheid en Suid Afrika is so n voorbeeld