Uitvoerende lede van Twitter sal met beamptes van die regering in Turkye vergader, het ʼn woordvoerder van die maatskappy Sondag gesê, nadat die land se eerste minister gesê het hy gaan dié sosialemedia-platform vir belastingontduiking vervolg.
Die woordvoerder van Twitter het nie verdere besonderhede verskaf nie. Na verwagting sal die vergadering Maandag plaasvind.
Eerste minister Recep Tayyip Erdogan het Saterdag die maatskappy beskuldig van belastingontduiking. “Twitter, YouTube en Facebook is internasionale maatskappye wat gevestig is om wins te toon en geld te maak,” het Erdogan gesê. “In hierdie stadium ontduik Twitter belastingbetaling. Ons sal dit ondersoek.”
Erdogan se regering het op 20 Maart gebruikers in Turkye toegang tot Twitter verbied weens vermeende inligting wat op sosiale media uitgelek het wat sy regering beskuldig van korrupsie.
Die verbod is op 3 April opgeskort nadat die hoogste hof dit as ʼn oortreding op reg van vryheid van spraak bevind het. -SAPA