Skermskoot uit die video
Alex Pring (7) is met ʼn gedeeltelik ontwikkelde regterarm gebore, maar het onlangs ʼn 3D-gedrukte bioniese arm ontvang van die strokiesprentheld, Iron Man.
Robert Downey Jr, wat die rol van Tony Stark in die jongste drie Iron Man-rolprente vertolk, het self die kunslidmaat aan Alex oorhandig.
Downey het ook een van die arms saamgebring wat hy in die fliek gedra het en die video op sy Facebook-blad gelaai.
Alex se arm is geskep deur Limbitless Solutions, ʼn vrywilligergroep wat deur Albert Manero begin is. Manero, ʼn PhD-student in ingenieurswese by die Universiteit van Sentraal Florida, druk die 3D-lidmate om dit dan gratis of baie goedkoop aan kinders beskikbaar te stel.
Alex se nuwe arm is die eerste van sy soort wat Limbitless gemaak en geskenk het aan ʼn behoeftige kind.
Soortgelyke prosteses kos tot $40 000 (byna R500 000), maar danksy Limbitless se tegnologie kos só arm slegs $350 (ongeveer R4 300).
Die eerste ding wat Alex met ʼn vorige prostese gedoen het, was om sy ma te omhels. Sien dié video hier.
