Video: Na tien jaar is ruimtetuig by komeet

‘n Skermskoot uit die video

‘n Skermskoot uit die video

Die Rosetta-ruimtetuig van die Europese Ruimte-agentskap kom Woensdag ná tien jaar by sy eindbestemming, die komeet 67P/Churyumov-Gerasimenko aan.

Dit sal met ingewikkelde maneuvers in ‘n wentelbaan om die komeet gaan en algaande nader en nader beweeg. Rosetta se landingstuig, Philae, sal op 9 November vanjaar op die komeet land.

Rosetta het 6,4 miljard kilometer afgelê in sy tog om uiteindelik by die komeet uit te kom. In die proses het dit verskeie kere by die aarde en Mars verbygeskuur om deur die slingervel-metode te versnel sodat dit ‘n snelheid soortgelyk as die komeet kon bereik.

Philae sal ‘n gat in die komeet boor om die samestelling daarvan te bepaal. Dié soort inligting word benodig om die ontstaan van die aarde en die heelal beter te verstaan. Rosetta het onlangs in sy nadertog na die komeet vasgestel dat dit uit twee koppe bestaan wat aanmekaar vas is. Dit sal Philae se landing heelwat moeiliker maak, en selfs Rosetta se omwenteling kompliseer.

Rosetta het op ‘n afstand van 5 000 kilometer die temperatuur van die komeet gemeet en vasgestel dat dit te warm is vir ‘n ysbedekking. Die komeet het ‘n donker, stowwerige oppervlak. Nogtans is die komeet se gemiddelde oppervlaktemperatuur minus 70 grade. Dit is tussen 20 en 30 grade warmer as wat verwag is.

Bronne: Trouw, De Standaard, Webwerf: Europese Ruimte-agentskap

 

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Wêreldnuus

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

2 Kommentare

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.