Die olifant het die krokodil by die watergat getakel. (Foto: Skermskoot/Latest Sightings)
ʼn Krokodil het sleg daarvan afgekom nadat ʼn olifantkoei met hom afgereken het. Die niksvermoedende krokodil is vertrap nadat dié glo die olifant se kleinding probeer bekruip het.
Beeldmateriaal van die voorval is op die aanlyn platform Latest Sightings gedeel waar mense video’s van hul ontmoetings met wilde diere deel.
In die video kan gesien word hoe ʼn olifant ʼn krokodil by ʼn watergat nader. Sy stamp eers die krokodil met haar slurp en kop voordat sy aggressief raak en op die dier begin trap.
Die olifant, wat nie slagtande het nie, gebruik naderhand haar volle gewig van meer as 3 ton om die krokodil te vertrap.
Voordat die krokodil eindelik van die vertrappery vrek, probeer die olifantkoei selfs om die dier aan die stert rond te swaai.
Die voorval, wat deur Hans Henrik Haahr tydens ʼn safari in Zambië op video vasgelê is, het glo gebeur etlike minute nadat die krokodil ʼn kalf wou aanval.
Volgens Latest Sightings het die voorval Haahr stom gelaat en kon hy dit nie anders as “skokkend” beskryf nie.
Dit is nie duidelik wanneer presies die aanval plaasgevind het nie.
Volgens Latest Sightings se webwerf is krokodille normaalweg opportunistiese jagters wat jong olifante geredelik teiken, terwyl olifante dikwels as vreedsame diere beskou word. Dié ma het egter nie op haar laat wag nie en het onmiddellik ingespring om haar kalf te beskerm.
Die video is al byna 50 000 keer op sosiale media gedeel en meer as 17 miljoen keer gekyk.
Die ma beskerm haar baba,hier by ons gooi moeders weer hulle baba’s weg,lees bietjie waar is hulle al opgetel.
Foeitog, die arme krokodil! Hoekom het hy nie maar gelos en weggeswem nie?
Vat so, jou dierasie!!!
n Olifant sonder slagtande. Dit moet n nuwe spesie wees?
Moet nie die krag van n ma onderskat nie…
Moenie met enige goeie ma mors nie! Jy sal slegste daarvan afkom hahahaha