Vyf mense is dood en 63 beseer toe ’n tornado Donderdag verskeie dorpe in die Tsjeggiese Republiek getref het. Die tornado het ook meer ’n 1 000 huise beskadig of vernietig.
Tydens die storm het reusehaelkorrels – glo so groot soos tennisballe – ’n aftreeoord en dieretuin in die stad Hodonin beskadig. Inwoners van die aftreeoord is sedertdien na ’n nabygeleë hotel geneem.
Die tornado het ook talle geboue, kerke, motors en bome vernietig en verskeie brande tot gevolg gehad.
Meer as 78 000 huise en werksplekke was teen Vrydagoggend nog sonder krag.
Erge skade is ook aan verskeie wingerde asook ’n wynlandgoed, wat as ’n Unesco (Verenigde Nasies se Opvoedkundige, Wetenskaplike en Kulturele Organisasie)-wêrelderfenisgebied gelys is, in die dorp Valtice aangerig.
Die weermag asook as ’n spesiale soekspan is ontplooi om nooddienswerkers met reddingspogings te help.
Volgens Marek Babisz, burgemeester van Hrusky wat die ergste deur die storm getref is, sê ingenieurs is tans besig om skadebepaling te doen om te kyk watter huise gesloop of gered sal word.
“Skoonmaakpogings word tans uitgevoer en ons is besig om kos en water aan inwoners te versprei.”
Dit was die eerste tornado wat die land in 17 jaar getref het ná een in 2004 sowat 50 huise beskadig het.
My geboorteland. Altyd hartseer om van natuurrampe te lees wat sulke chaos veroorsaak. Gelukkig het ek nie familie in daardie gedeelte van die land nie. Blykbaar is dit die ergste tornado wat die land nog getref het.