Video: Woede ná polisieman op leerder se nek kniel

In die video is dit duidelik hoe die polisiebeampte die meisie se kop in die grond druk en daarna vir sowat ’n halwe minuut op haar nek kniel (Foto: Twitter)

’n Pa van Wisconsin in die VSA soek geregtigheid vir sy 12-jarige dogter nadat ʼn polisiebeampte – wat nie aan diens was nie – na bewering op haar nek gekniel het. Die pa eis nou dat die beampte krimineel aangekla moet word.

Die voorval het op 4 Maart by die Lincoln Middle School in Kenosha, Wisconsin, afgespeel. Die beampte, Shawn Guetschow, van Kenosha, Wisconsin, het deeltyds daar as sekuriteitswag gewerk.

ABC News berig die pa, Jerrel Perez, se dogter het tydens middagete met ’n ander leerder in ʼn skermutseling betrokke geraak. Beeldmateriaal van ʼn kringtelevisiekamera in die eetsaal wys hoe Guetschow die leerders uitmekaar probeer hou.

In die video is dit duidelik hoe Guetschow die meisie se kop in die grond druk en daarna vir sowat ’n halwe minuut op haar nek kniel. Hy boei haar dan en lei haar uit die eetsaal.

NBC News berig Perez het gevra dat ’n kriminele aanklag teen Guetschow aanhangig gemaak moet word. Volgens hom is sy dogter tans in terapie en besoek sy ’n neuroloog vir haar beserings.

Die skool het Guetschow op betaalde verlof geplaas, waarna hy Dinsdag self bedank het.

In sy bedankingsbrief het Guetschow gekla die skool het hom nie ondersteun nie en dat die voorval ’n swaar las op sy gesin plaas.

Hy is steeds as beampte aan diens by die polisie in Kenosha.

Perez het ’n skermgreep van die video op Facebook geplaas langs ’n foto van die polisiebeampte Derek Chauvin wat sy knie op George Floyd se nek in ’n Minneapolis-straat druk. Chauvin is verlede jaar skuldig bevind aan moord op Floyd.

“Vertel my wat die verskil is tussen die twee,” het Perez langs die foto’s geskryf.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

31 Kommentare

jongste oudste gewildste
Johannes_64

Is dit nie half vreemd hoe die wêreld die oorsaak van so iets totaal mis kyk nie. Mens kan jou indink hoe die pa moet voel oor die behandeling, maar nêrens vra hy om verskoning vir sy dogtertjie se optrede nie….

Willem

Baie swak resolusie videomateriaal. Mens kan enigiets hieruit probeer aflei. Ek werk met cctv en die kwaliteit video van my toerusting is 100 keer beter. Ek dink nie hierdie video sal n hof van die beampte se skuld oortuig nie.

Martie

Die boompie is duidelik nie gebuig toe sy klein was nie, die feit dat sy baklei het stuur klaar rooi vlaggies op.

Kobus

Stem nie saam met die optrede nie maar dit lyk of sussie nogal veglistig kan wees. Word die polisie in VSA opgelei om op mense se nekke te kniel om hulle te bedaar?

Renier johannes

Gedra haar soos n krimineel