Vier in Australië dood weens listeriose

Argieffoto

Vier mense is in Australië dood ná hulle glo spanspek geëet het wat met listeria besmet was.

The  Guardian berig altesaam 17 gevalle is Woensdag oor die oostelike state van Australië aangemeld met twee sterftes in onderskeidelik Victoria en New South Wales.

“Die vierde mens, van Victoria, is glo reeds verlede week dood, maar resultate wat bevestig dat hy aan listeriose gesterf het, is nou eers beskikbaar,” lui die berig.

Perth Now berig dat gesondheidsowerhede in New South Wales (NSW) gesê het die mense wat in dié staat dood is, is ʼn man en ʼn vrou wat gebore is met “onderliggende mediese toestande”.

ʼn Woordvoerder van NSW-gesondheid het gesê die sterftes is nie dadelik aan die listeriose-uitbreking gekoppel nie.

ʼn Spanspekboer se plaas in Nericon in NSW is intussen as die bron van die verdagte vrugte vasgestel. Die boer het sedertdien ingestem om die verspreiding van dié vrug te staak.

Die regering in NSW is intussen daarvan beskuldig dat hulle te lank geneem het om die publiek te waarsku ná ondersoeke in Januarie van stapel gestuur is.

Maroela Media het vroeër berig listeriose word veroorsaak deur die bakterie Listeria monocytogenes.

Dit word aan mense oorgedra deur die inname van besmette voedselprodukte. Enigiemand kan listeriose opdoen hoewel swanger vroue, bejaardes en mense met ʼn verswakte immuunstelsel of onderliggende toestande soos diabetes, kanker of MIV/vigs meer vatbaar is.

Die Wêreldgesondheidsorganisasie (WHO) het bevestig die uitbreking van listeriose in Suid-Afrika is die grootste wat nog ter wêreld aangeteken is. Meer as 700 gevalle is tydens 2017 aangemeld en meer as 900 gevalle sedert die uitbreking begin het. Meer as 180 mense is reeds dood.

Voorvalle is in al nege provinsies in Suid-Afrika aangemeld, maar veral in Gauteng. Die bron van dié uitbreking is intussen geïdentifiseer as die Enterprise Foods-aanleg in Polokwane wat polonie, Weense worsies en kouevleissoorte vervaardig. Alle produksie is gestaak en Enterprise-produkte is onttrek.

Die inkubasietydperk vir listeriose wissel van drie tot 70 dae. Simptome is gewoonlik lig en sluit in koors, spierpyne, ongesteldheid, naarheid en diarree.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
E.K. die eerste

Ek moet een ding sê en dis dat ek nie glo SLEGS Enterprise produkte is die oorsaak nie. Daar is glo heelwat babas (infants vlg die verslag) dood aan die siekte en ek kannie dink hulle het polonie of russians geëet nie. Ek weet nie watter ouderdomme hul is en as hul wel nog babas was was dit dalk in melk/melkprodukte. Ek sou sê daar moet na verdere oorsake ook gesoek word. Die man in die Oos Kaap was ‘n vegetariër wat graag sagte kaas by plaas/mark gekoop het so dit kon is sy geval die oorsaak gewees het. Nou… Lees meer »

Polonykwane en verder oor die see

Is hierdie pestilensie nou in Australië ook! Mens kan nie eers meer vrugte eet nie. Sommige van die vrugte op die rake hier word van ander lande af ingevoer.

wilma

Dit sal interessant wees om te weet hoe virus in/op die spanspekke gekom het.

Oopsie

So dit is NIE net geprosesseerde voedsel/vleise nie? Vorige sake is ook aangemeld van mense wat vrugte/groente wat geeet het. Weet nou nie meer wat ons mag en nie mag eet nie. Almal het nou Afrika en Venezuela skuld gegee, Australie is ‘n hele entjie hiervandaan en hulle is SOOOOO streng jy mag nie eers kraletjies dra wat uit hout of saad gemaak is nie .. oops!

Nico K

Dit is blykbaar ‘n feit dat daar jaarliks omtrent 100 mense in SA sterf aan die siekte. Dit is dus nie net die polonie nie. Die media het dit bietjie uit verband geruk.