Foto: Xabryna Kek/Channel NewsAsia/Facebook
Volgens die berig het ʼn Indonesiese vlootskip die vier groot voorwerpe met behulp van sonartegnologie gevind. ʼn Onderwatervoertuig is intussen in die water gesit om foto’s van die voorwerpe, wat glo sowat 30m diep is, te neem.
Die BBC berig ook dat 30 liggame reeds gevind is. Meeste van die liggame is vermoedelik in die vliegtuig se romp vasgekeer. Die soektog na die vliegtuig se vlugopnemers gaan intussen ook onverpoosd voort.
AirAsia Vlug QZ8501 het Sondag tussen Surabaya in Indonesië en Singapoer verdwyn. Die Airbus A320-200 met 162 persone aan boord het verdwyn nadat die vlieënier versoek het om van koers af te wyk weens slegte weersomstandighede.
Daar was 137 volwassenes, 17 kinders en een baba aan boord tesame met twee vlieëniers en vyf bemanningslede. Een van die passasiers is van Engeland, een van Maleisië, een van Singapoer en drie van Suid-Korea. Altesaam 149 passasiers is van Indonesië. Een van die bemanningslede is van Frankryk en ses van Indonesië.
Lees alle vorige berigte oor Vlug QZ8501 op Maroela Media.
