Wetgewing vir groter Skotse outonomie gou klaar

Foto: David Cheskin/PA Archive/Press Association Images

Foto: David Cheskin/PA Archive/Press Association Images

Wetsontwerpe om groter outonomie aan Skotland en terselfdertyd aan Wallis en Noord-Ierland te gee, moet einde Januarie 2015 reeds voltooi wees.

Dit geskied ooreenkomstig beloftes van die leiers van Brittanje se drie grootste partye, sou die Skotte nié met hul referendum vir onafhanklikheid stem nie. Die Skotte het Donderdag uiteindelik teen onafhanklikheid gestem.

Dit is moeilik om presies vas te stel wat die inhoud van die uitgebreide outonomie is, en verskillende bronne noem verskillende aspekte. Een van die beloftes wat bekend is, is dat die Skotte nou volledige beheer sal verkry oor geld wat vir gesondheidsorg in Skotland beskikbaar gestel word. Die leiers het ook ooreengekom dat Skotland uitgebreide bevoegdhede vir die invordering van belasting sou kry.

Vroeër is berig dat die ooreenkoms tussen die partyleiers ook magte oor welsyn en werkskepping sou insluit, berig Mail Online.

Intussen berig die New York Times dat die Britse premier, David Cameron en self van Skotse herkoms, deur parlementslede in sy eie Tory-party verkwalik word vir die groter outonomie wat aan Skotland beloof is. Sommiges eis nou dat Engeland soortgelyke selfregerende magte, en ook sy eie parlement moet kry.

Bronne: Trouw, New York Times, Mail Online en Live Mint

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Wêreldnuus

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae