Ysingwekkende teorie oor vermiste vlug MH370

Argieffoto

ʼn Span lugvaartkundiges het dié week tydens ʼn paneelgesprek op die Australiese joernaalprogram 60 Minutes ʼn ysingwekkende teorie voorgelê wat volgens dié span aanleiding tot die MH370-lugramp in 2014 gegee het.

Vlug MH370 het op 8 Maart 2014 verdwyn terwyl dit vanaf Kuala Lumpur na Beijing op pad was. Daar was 239 mense aan boord en die vliegtuig is nooit opgespoor nie. ʼn Drie jaar lange soektog na die Boeing 777 is in Januarie verlede jaar gestaak.

Washington Post berig die kundiges het tydens die gesprek gesê van die 239 mense aan boord was 238 waarskynlik bewusteloos kort voordat die vliegtuig van die radar verdwyn het, en dus totaal onbewus van die feit dat hulle op dié vlug sou sterf.

Die vinger word gewys na Zaharie Ahmad Shah (53), die vlieënier wat volgens die kundiges die enigste mens in die kajuit was wat nié bewusteloos was nie. Hy wou glo sy eie lewe tydens die vlug neem en daarmee saam ook 238 ander mense vermoor, iets wat hom aan voorbedagte massamoord sou skuldig maak.

Die kundiges is van mening dat Shah die beheerde druk in die kajuit verminder het wat veroorsaak het dat die passasiers hul bewussyn sou verloor indien hulle nié suurstofmaskers gedra het nie. Die kundiges meen dié teorie sou ook die stilte aan boord van die vliegtuig verduidelik kort voordat die vliegtuig verdwyn het, die feit dat geen van die passasiers boodskappe aan geliefdes gestuur het nie, geen noodoproepe gemaak is nie en dat die radiotoring geen kommunikasie van die vlieënier oor ʼn noodtoestand ontvang het nie.

Volgens die paneel dui die ondersoek daarop dat die vliegtuig by twee afsonderlike voorvalle bo Penang in Maleisië, Shah se tuisdorp, na links gedraai het – volgens die kundiges sodat hy vir ʼn laaste keer oor die dorp kon uitkyk.

Larry Vance, ʼn ondersoekbeampte wat aan die hoof van die MH370-ondersoek was, het tydens die paneelgesprek gesê die ware gebeure rondom dié ramp sal waarskynlik nooit bekend wees nie, maar daar is volgens hom tog wel teorieë wat meer sin maak as ander. “Die teorie wat die meeste bespreek word, is dat die beheerde druk binne die kajuit verminder is,” het hy gesê. “Shah was vermoedelik besig om selfmoord te pleeg. Ongelukkig het hy al die ander passasiers aan boord ook vermoor – en hy het dit doelbewus gedoen.”

Simon Hardy, ʼn senior Boeing 777-vlieënier en vluginstrukteur, het gesê hy het veral ondersoek ingestel na die rede waarom die vliegtuig meer as twee keer bo Penang na links gedraai het. “Ek het probeer uitpluis wat die tegniese rede hiervoor kon wees, en ná twee maande het ek dit besef: Iemand was besig om by die venster uit te kyk. Dit was moontlik ʼn totsiens aan sy [Shah] se tuisdorp.”

Argieffoto

Vroeër die jaar is weer berig dat daar ná vier jaar steeds nie antwoorde is waarom die vliegtuig verdwyn het of waar die wrakstukke van die vliegtuig is nie. Die paneel kundiges het daarom een van die moeilikste vra rondom die ramp probeer beantwoord: Hoe kan ʼn hedendaagse moderne vliegtuig wat deur satelliete en radar opgespoor kan word, net verdwyn?

Volgens die paneel het die vliegtuig verdwyn omdat Shah wou “hê hy moes verdwyn”. En die vlieënier, wat 20 000 uur vlugervaring gehad het, het al die nodige kennis gehad om so iets reg te kry aangesien hy in die proses was om ʼn vlugsimulator by sy huis te bou.

Shah en sy mede-vlieënier, Fariq Abdul Hamid, is sedert die begin van die ramp as die hoofverdagtes in die hele raaisel beskou. Onstuimighede in Shah se persoonlike lewe word sedert die begin voorgehou as rede waarom hy sy eie lewe sou wou neem. Sy vrou het ná sy dood bevestig dat hul huwelik op die rotse was en dat hy geweier het om ʼn huweliksberader saam met haar te gaan sien.

Ander teorieë is dat hy die vliegtuig gekaap het uit protes teen die inhegtenisneming van Anwar Ibrahim, die destydse opposisieleier van Maleisië.

ʼn Groep met die naam Chinese Martyrs’ Brigade het verantwoordelikheid vir die ramp geneem, maar owerhede het later gesê dit is bloot gekskeerdery.

Die jongste onsuksesvolle poging om die vliegtuig op te spoor is deur die Texas-maatskappy Ocean Infinity van stapel gestuur en het $70 miljoen gekos. Tydens die soektog is 500 vierkante myl per dag vir drie maande gefynkam. Die ondersoek het nie ʼn enkele leidraad opgelewer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

14 Kommentare

jongste oudste gewildste
Johann cb

Baie interessant! (En die teorie stuur koue rillings deur my!) Mens wonder dan wáár die vliegtuig se wrak werklik is! Mikien word die hele vliegtuig nét so weggesteek – passassiers en al…

CJ

Die teorie maak heeltemal sin. Net jammer ons as passasiers het nie vooraf n keuse van saam met watter vlieënier ons aan boord wil klim, of nie.

Teorie

‘n Aanvaarbare teorie, tog was daar beweer dat ‘n stuk wel opgespoor was?

Oom Kalahari

Die Rothchild sage, dit se alles.