Nathanael Pianta hou die Lausanne 2020 Jeug Olimpiese Vlam omhoog buite die Olimpiese Museum in Switserland (Foto: Joel Marklund/Olympic Information Service via AP)
ʼn Vroulike ysskaatser is ernstig beseer toe sy sowat vyf meter ver na die ys geval het tydens ʼn repetisie vir die openingseremonie van die Jeug Olimpiese Winterspele in Lausanne, Switserland.
Die 35-jarige vrou van Rusland se toestand is baie ernstig, het die polisie Woensdag gesê. Sy is aan ʼn kabel opgehys wat aan die dak van die hokkiestadion vasgemaak is toe sy skielik haar balans verloor en geval het.
Die polisie stel ondersoek in oor die redes en omstandighede wat tot die voorval gelei het en wie ook moontlik aanspreeklik gehou kan word.
Die Internasionale Olimpiese Komitee het in ʼn verklaring gesê die vrou word in ʼn hospitaal in Lausanne behandel. Hulle het nie verdere besonderhede oor die voorval verskaf nie. “Die IOK en Lausanne 2020 wens die kunstenaar spoedige beterskap toe,” lui die verklaring.
Die twee week lange Spele begin Donderdag met ʼn seremonie in ʼn nuwe arena waar die manshokkiekampioenskap in Mei aangebied word.
