Zelenski wend hom tot skarefinansiering

Die Oekraïense president, Wolodimir Zelenski. (Foto: AFP via Oekraïense presidensie)

Die Oekraïense president, Wolodimir Zelenski, het Donderdag ʼn wêreldwye skarefinansieringsplatform, United24, bekendgestel in die hoop dat dié geld hulle sal help om die oorlog teen Rusland te wen en eindelik die land se infrastruktuur te herbou.

“Met een klik kan jy geld skenk om ons te help om burgerlikes te red en Oekraïne te herbou,” het hy gesê.

“Elke skenking maak saak vir oorwinning.”

Nege weke ná Rusland se inval in Oekraïne het talle stede onder grootskaalse verwoesting deurgeloop, en miljoene is landuit in ʼn poging om van die anargie te ontsnap.

Zelenski het egter mense wêreldwyd aangespoor om Moskou te help verslaan en die voortslepende konflik tot ʼn einde te bring.

“Slegs sáám het ons die potensiaal om die oorlog stop te sit en te herbou wat vernietig is,” sê hy.

Zelenski het bygevoeg dat Oekraïners vir altyd mense se bydraes sal onthou.

“Alle skenking sal na die nasionale bank van Oekraïne oorgeplaas en aan die betrokke departemente toegeken word.”

Die Oekraïense regering sal glo elke dag ʼn bywerking gee oor hoe hierdie geld bestee word.

Dit is nie die eerste keer dat die Oekraïense regering só ʼn insamelingspoging van stapel stuur nie.

In Maart het die regering die Aid for Ukraine-webwerf bekendgestel wat in vennootskap met kripto-firmas alle skenkings na Oekraïne se sentrale bank gestuur het.

Deur skenkers die kans te bied om met 10 kripto-geldeenhede te skenk, waaronder Bitcoin, was die veldtog ʼn onmiddellike treffer en op 19 Maart is meer as $60 miljoen reeds geskenk. $10 miljoen hiervan is binne ʼn paar dae van die bekendstelling geskenk.

Kiëf het reeds militêre bystand van talle lande ontvang om sy relatiewe klein weermag aan te vul. Tog is sy magte steeds kleiner as Rusland sʼn.

Zelenski het sedert die aanvang van die inval verskeie lande se parlemente byna op ʼn daaglikse grondslag toegespreek in die hoop dat verdere bystand aan Oekraïne verleen sal word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

16 Kommentare

jongste oudste gewildste
Marthinus

Uitgelekte inligting die afgelope paar dae uit Amerika wys dat hulle Oekraine sedert 2005 militer oplei, onder andere op weermagbasisse in Duitsland. En hulle het Kief van satellietinligting verskaf. Dus: dis nie die “klein Oekrainse weermag” waaroor almal swymel nie, dis n regte [proxy] oorlog tussen Amerika en Rusland.

Dries

Wen eers die oorlog mnr. Die Pres. Zelenski. Ek sal kom help bou. Julle is n brawe nasie soos ons Afrikaners eens ook was

Samuel

Ten minste gaan die skenkergeld nie verduister word nie.

Hayntjie

Pole het intussen aangedui dat dit ʼn finansiële uitdaging geword het om die meer as 2 miljoen Oekraïners in Pole te versorg. Hulle moet moontlik Oekraïne se voorbeeld om finansiering daarvoor te volg vind.

Pieter

Oekraïne is bekend as een van die korrupste lande in daardie geweste. Zelensky het ook opposisie partye verbied en is bekend daarvoor om sy opponente en andersdenkendes te vermoor. Daarby ondersteun sy weermag Nazi beginsels. Hy is ook skatryk soos ons eie Rampadda. Hierdie komediant is nie so onskuldig as wat hy hom voordoen nie, hy het Poetin gesoek vir ‘n klap. En nou lag die VSA want hul wapenindustrie trek voordeel.