’n Studie wat in Frans-Polinesië gedoen is, waar baie mense die Zika-virus onder lede het, toon dat die virus in 2,4 gevalle uit elke 10 000 tot die Guillain-Barrésindroom kan lei. Dit sal egter nie die enigste oorsaak wees nie.
Die nuwe studie, wat deur prof Arnaud Fontanet gelei is, word vandag in die mediese vaktydskrif, The Lancet, gepubliseer. Hy is van die Instituut Pasteur in Parys.
Normaalweg veroorsaak die Zika-virus die breintoestand mikrosefalie, en is nou veral in Brasilië ’n groot probleem waar die Olimpiese Spele later vanjaar plaasvind. Dit word deur muskiete oorgedra.
Die studie het bevind dat 20 keer soveel gevalle van Guillain-Barrésindroom in Frans-Polinesië voorkom as voor die Zika-virus daarheen versprei het. In byna al die gevalle wat ondersoek is, het dit geblyk dat die pasiënt onlangs deur die Zika-virus besmet is.
Nie alle kenners is egter nog oortuig van die bevindinge nie.
Lees meer: The Lancet, Belga
Ag Maroela, ons is nie almal kenners op die mediese gebied nie. Kan u asseblief verduidelik wat is die simtome van hierdie siektetoestand.