Zimbabwe: Hoe lyk die toekoms nou?

Pres. Robert Mugabe van Zimbabwe.

Pres. Robert Mugabe en sy vrou, Grace, is wel Sondag van hul pligte in Zanu PF, die regerende party in Zimbabwe, onthef, maar ʼn onseker toekoms lê nou vir dié land voor.

Maroela Media het pas berig dat Emmerson Mnangagwa, die voormalige adjunkpresident wat onlangs die trekpas gekry het, as Zanu-PF se president aangewys is.

Ander lede van die party wat glo ook die trekpas gekry het, is Ignatius Chombo, Jonathan Moyo, Saviour Kasukuwere en Patrick Zhuwao.

Die situasie in Zimbabwe kan volgens kenners nou op verskillende maniere ontvou. Mugabe kan as president van die land bedank of hy kan in ʼn staat van beskuldiging geplaas word. Volgens berigte is die speaker van Zimbabwe se parlement reeds in kennis gestel van die voorneme om ʼn mosie van wantroue teen Mugabe in te dien. Die speaker het glo ook ingestem om die parlement Dinsdag byeen te roep.

David Coltart, Zimbabwe se voormalige minister van onderwys, sport en kuns en kultuur, het vroeër die week in ʼn meningstuk in Daily Maverick gesê art. 96 van die Zimbabwiese grondwet maak voorsiening vir Mugabe om te bedank indien hy homself in ʼn onhoudbare posisie bevind.

Volgens Coltart, deesdae ʼn Zimbabwiese aktivis en menseregteprokureur, maak art. 97 van die grondwet voorsiening vir Mugabe om verwyder te word. “Hierdie artikel bepaal dat as ʼn eenvoudige meerderheid van die senaat en die nasionale vergadering glo die president moet uit sy amp verwyder word vanweë ernstige wangedrag, sy versuim om die grondwet te handhaaf of sy onvermoë om die funksies van die amp te verrig, hulle by magte is om ʼn komitee saam te stel wat alle partye in die parlement verteenwoordig om die president se verwydering te ondersoek.”

Coltart het gesê indien die komitee aanbeveel dat die president uit sy amp ontslaan moet word, kan ʼn gesamentlike sitting van die senaat en die nasionale vergadering stem vir sy verwydering. Indien twee derdes ten gunste hiervan stem word die president onmiddellik uit die kussings gelig.

Volgens Coltart tree art. 14 (4 en 5) van die sesde skedule dan in werking om ʼn plaasvervanger vir die president te kies. “Die artikels bepaal dat die persoon wat mees onlangs die waarnemende president was, vir ‘n tydperk van 90 dae sal waarneem as president, terwyl die regerende party, in die geval die Zanu-PF, vanuit eie geledere ʼn plaasvervanger kies om die ampstermyn te voltooi. Die persoon sal dan president wees tot volgende jaar se verkiesing.

Zimbabwe se Financial Gazette het vroeër berig Mnangagwa beplan vermoedelik ʼn oorgangsregering wat die opposisie sal insluit. Volgens die berig sal Mnangagwa die oorgangsregering saamstel wat na verwagting vir vyf jaar sal regeer, voordat die land ʼn verkiesing sal hou, het hooggeplaaste bronne gesê. Mnangagwa se mandaat, volgens die militêre plan, sal insluit om die oppergesag van die wet te herstel en die land se wankelende ekonomie te stabiliseer.

Verskeie bronne meen egter die oorgangsregering sal net tot Augustus volgende jaar duur wanneer die nuwe algemene verkiesing sal plaasvind.

Gevolge vir Suid-Afrika

Prof. Anthoni van Nieuwkerk, ʼn ontleder van buitelandse en sekuriteitsbeleid verbonde aan die Universiteit van die Witwatersrand, het vroeër aan Maroela Media gesê hy reken Suid-Afrika sal ʼn reusagtige humanitêre krisis die hoof moet bied sou Zimbabwe heeltemal te midde van ʼn staatsgreep verval met miljoene Zimbabwiërs wat oor die Limpopo die land sal binnestroom.

“Suid-Afrika sal eenvoudig sy buurland moet help om te stabiliseer. Ons kan hulle egter nie met ons eie weermag binneval nie – die Suid-Afrikaanse weermag is in elk geval te swak en het nie geld nie; boonop moet die Zimbabwiese regering of die land se mense Suid-Afrika nooi om in te gryp,” het Van Nieuwkerk gesê.

“Die oplossing vir Zimbabwe is as die private sektor, burgerlike samelewing en die regering om ʼn tafel sou gaan sit vir samespreking. Suid-Afrika kan die tafel vir dié onderhandelingsproses dek.”

Bykomende bron: Daily Maverick

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
Barry

My meening rondom die is SA gaan oorbevolk raak wat al reeds die geval met die volg mense gaan moor,dis so goed ek neem die hele kinderhuis in dis waansin dis kan nie werk nie.

jcwf

President Mnangagwa is een van die rykste mense van Zimbabwe en behoort tot dié wat Mugabe lank ondersteun het. Van hom kan die bevolking min verandering of verbetering verwag, hoewel die bevolking sal dit eis.

Daar kan ‘n burgeroorlog kom.

Chris

Net ‘n vraag aan die agbare Prof Nieuwkerk, en ek neem kennis van sy nering. Op grond van wat se hy die SA Weermag is te swak? het hy ‘n studie gedoen ? lees hy ooit “Defence Web RSA” Dat die weermag te min fondse het is algemene kennis ,maar om te se die SA weermag is te swak klink vir my na n stelling sonder bewyse.

zettie

Dis n skande. Dat ons eens sterk weermag , moes plek maak vir n swak weermag ,wat ons land nie eers kan beskerm nie. Bring n paar “ou manne” terug om ons weermag op te lig.

Wolf Cilliers

Dit lyk asof Zimabawe se toekoms steeds tot ‘n groot mate deur China bepaal gaan word. Die Chinese het glo ook al gevat wat hulle kon uit die nuwe diamantveld. Sien ook https://www.theguardian.com/world/2017/nov/17/zimbabwe-was-mugabes-fall-a-result-of-china-flexing-its-muscle