Winkelsentrum ontruim na bomdreigement

Die Kolonnade-winkelsentrum, noord van Pretoria, is Vrydagmiddag ontruim na ʼn bomdreigement.

Volgens die sentrum se bestuur is daar kort voor 15:00 Vrydagmiddag ʼn bomdreigement ontvang en is die polisie onmiddellik in kennis gestel. Mense is intussen uit die sentrum ontruim terwyl die polisie se bomeenheid die gebou gefynkam het. Volgens ooggetuies het die polisie alle ingange na die sentrum versper en is geen voertuie toegelaat om die perseel binne te kom of te verlaat nie. Die sentrum is egter om 16:20 veilig verklaar en winkels maak gereed om weer besigheid te doen.