Dirk Hermann, adjunk uitvoerende hoof van Solidariteit, saam met ao. Jannie Odendaal
Adjudant-offisier Jannie Odendaal en konstabel Abel Twala is van intimidasie, aanranding en die rig van ʼn vuurwapen aangekla deur Jacob Olebile Monare, Madikizela-Mandela se lyfwag. Odendaal en Twala het in die spervuur gekom nadat hulle die voertuig waarin Madikizela-Mandela op 30 Desember 2010 gery het, van die M1-Noord afgetrek het omdat die bestuurder na bewering roekeloos en teen ʼn hoë spoed deur die verkeer gevleg het. Hulle is in Februarie 2011 met salaris en voordele hangende ’n interne ondersoek geskors.
Die vakbond Solidariteit sê hy gaan die moontlikheid ondersoek om Monare van kwaadwillige vervolging aan te kla .Solidariteit het ook versoek dat die klagtes wat destyds teen Madikizela-Mandela en haar lyfwagte aanhangig gemaak is, weer ondersoek word en dat die arbeidsregtelike klagte teen die polisiebeamptes nou ook teruggetrek word. Volgens Dirk Hermann, adjunk uitvoerende hoof van Solidariteit, moet die aanklagte wat Odendaal en Twala teen Madikizela-Mandela en haar lyfwagte gemaak het weer ondersoek word. “Madikizela-Mandela is van dwarsboming van die gereg aangekla terwyl klagte van aanranding en roekelose of nalatige bestuur teen onderskeidelik haar lyfwag en bestuurder ingedien is. Die Nasionale Vervolgingsgesag het egter in September verlede jaar die aanklagte teen hulle laat vaar terwyl Odendaal en Twala strafregtelik vervolg is.”
