Wits-universiteit het Donderdag om verskoning gevra nadat ʼn doodsberig, wat hy solank vir voormalige pres. Nelson Mandela opgestel het, op Google se soektogenjin beland het.
“Wits vra opreg om verskoning vir Mandela se familie, vriende, mede-Suid-Afrikaners en wêreldburgers vir dié flater,” het Shirona Patel, woordvoerder van die universiteit, in ʼn verklaring gesê. “Die universiteit het ʼn verklaring uitgereik wat in sy stelsel weggesteek is. ʼn Tegniese fout het egter die berig deur ʼn soekfunksie op Google beskikbaar gemaak. Ons het in geen stadium bedoel om die verklaring uit te reik of op die webwerf te publiseer nie.”
Wits is jammer oor die ongeluk en sal die nodige stappe doen om die fout te herstel en seker te maak dat die betrokke partye aanspreeklik gehou word.