(Foto: ER24)
Vier mense is Maandagmiddag beseer in ʼn beweerde ontploffing by ʼn fabriek in Wynberg, Sandton. Een van die beseerdes is in ʼn kritieke toestand.
Paramedici van ER24 sowel as Johannesburg se brandweer- en reddingsdienste het by die fabriek opgedaag en twee pasiënte buite die fabriek aangetref. Verskeie ander pasiënte was steeds in die fabriek.
Volgens paramedici het een man verskeie ernstige brandwonde opgedoen terwyl drie ander mense minder ernstige brandwonde opgedoen het.
Die beseerdes is op die toneel behandel en die kritiek beseerde is van gevorderde lewensondersteuningsingryping voorsien. Die beseerdes is na nabygeleë hospitale vervoer vir verdere behandeling.
Die besonderhede rondom die voorval is nog nie bekend nie, maar owerhede was op die toneel om verder ondersoek in te stel.
