Opgestel deur die Podlitiek-span
Die Podlitiek-paneel bring hierdie week weer ʼn bietjie hitte teen die koue winter met pittige analise en ʼn klein bietjie spot oor ʼn paar groot nuusstories.
Die eerste segment handel oor die proses wat tans aan die gang is om die bevoegdheid van adv. Busisiwe Mkhwebane se geskiktheid te toets om in die amp van Openbare Beskermer te dien. Die paneel bekla die land se lot dat so ʼn belangrike posisie skynbaar so ver van sy eertydse glorie geval het.
ʼn Volgende storie, wat direk daarby aanhaak, is die ANC se pas afgelope beleidskonferensie. Die ANC se topdenkers kom voor elke groot konferensie byeen en stel beleidsrigtings voor wat die party, en noodwendig die land, se rigting in die vyf jaar na afloop daarvan sal rig. Die kommerwekkende agtergeblewendheid van die idees wat op hierdie kongres se tafel was, laat die paneel wonder oor die toekoms van die ANC.
ʼn Derde storie begin by die VSA se poging om die definisie van ʼn resessie te verander, maar kom uiteindelik uit by die idee dat definisies sommer maar net verander kan word om ideologiese posisie te pas. Waar eindig hierdie tendens as ons eers daarmee begin?
Luister Podlitiek vir hierdie, en meer!
- Die Podlitiek-span bestaan uit Paul Maritz, Ernst van Zyl (AfriForum) en Frederik van Dyk.