Podlitiek: Misdaad groei, olieprys gesnoei, en inperking gestoei

Opgestel deur die Podlitiek-span

Foto: (AP Photo/Charles Rex Arbogast)

Op die oog af lyk Suid-Afrika, soos in die liedjie van die sepie Binnelanders, “heel gesond”. Die probleem is egter dat dit wat op die oppervlak sigbaar is, nie noodwendig altyd die waarheid en werklikheid weerspieël van wat eintlik aan die gang is nie. Suid-Afrika, so leer ons almal tans, het heelwat verskuilde probleme wat deur uitdagings soos dié wat tans heers, ontbloot word. Om hierdie verskuilde probleme te vind en bloot te lê, is die Podlitiek-span weer op hul pos.

Hierdie week begin hulle deur te kyk na die skokkende toename in sekere soorte misdaad, soos veral vandalisme en stropery van winkels en vragmotors, wat in die afgelope week posgevat het. Ondanks die toename in polisie- en weermaglede, kom dit nie voor asof die golf van hordemisdaad enigsins afneem nie. Podlitiek wonder of hierdie tipe misdade nie selfs nog meer gaan toeneem in die volgende weke soos wat mense meer angstig en honger raak nie.

ʼn Volgende storie is die merkwaardige nuusgebeurtenis dat die olieprys onder $0 geduik het. Wat beteken hierdie skynbaar onverklaarbare fenomeen, wat is die oorsprong daarvan, en mees belangrik, wat beteken dit vir die verbruiker? Die Podlitiek-span stel ondersoek in na hierdie vreemde, skynbaar eenmalige verskynsel, en skei feite van fiksie.

ʼn Laaste storie, wat met die eerste twee verband hou, is die vraag op almal se lippe: Waarheen nou? Die Podlitiek-span wonder of president Cyril Ramaphosa die pyp kan rook, en die land kan stuur in die rigting wat nou nodig is? Om die land vir ʼn verlengde periode “op te sluit”, sal sekerlik nie deug nie, en om al die bepalings op te hef, sal sekerlik die probleem net vererger en die impak van die inperking ongedaan maak. Die Podlitiek-span bespreek verskeie modelle wat tans voorgestel word vir die pad vorentoe, en watter model hulle glo die beste pad sal wees om te volg.

By Podlitiek lewer ons nie net die nuus nie, ons maak dit. Luister Podlitiek.

Die Podlitiek-span bestaan uit Hermann Pretorius (IRV), Ernst van Zyl (AfriForum), Paul Maritz (Solidariteit) en Daniël Eloff (Hurter Spies Ing.).

 

Hierdie plasing is deur ʼn onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Deel van: Meningsvormers, Podsendings

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

1 Kommentaar

jongste oudste gewildste
J

Kry die gratis oorskot olie vir Eskom se kragsentrales terwyl die steenkool uitgevoer word vir kosbare buitelandse valuta?